Salmo 66:5-20

⁵Omali kayo ta ilaen yo amin din inamag di Apo. Inamag na di nakaskasdaaw ay inilan di kaipoipogaw.

⁶Din baybay yan nanbalinena ay namgaan din lanad na, siya abe sin ginawang et nandan din ipogaw na sin nanbalasatan da, isonga dayawen takos sisya.

⁷Manturay si eng-enggana babaen sin panakabalina, din nanasyon et kanayon ay il-ilaena, maga koma di mangontra en sisya.

⁸Amin ay ili, dayawen yo din Diyos tako, ikanta yo din panangdayaw yo.

⁹Inayowanana din biyag tako, adi na inpalobos ay maisokba tako.

¹⁰Tan pinadas mos dakami, Apo, nilinisam dakami ay kaman balitok ay maioto.

¹¹Inpalobos mo ay matagdey kami, inpabaklay mo di nadagsen en dakami.

¹²Pinalobosam din kalaban mi ay mangigatigatin en dakami. Sin nanligligatan mi, kaman apoy ya layos di nilasat mi, ngem ed wani, in-ey mos dakami si nabaknang ay ili ay pantean mi.

¹³Man-idatengak to si daton ay mapooan sin beey mo et tongpalek din inkarik en sik-a, Apo,

¹⁴sin timpon di ligat ko.

¹⁵Man-idatonak si mankalalames ay karnero ta maidaton ay maipoo. Man-idatonak to abe en sik-a si bomaro ay kalding ya baka.

¹⁶Omali kayo ay mangipatpateg en Diyos Apo ta din inam-amag nan sak-en, dad-atek en dakayo.

¹⁷Nan-adawagak ay nankedkedaw si badang na, nankankantaak ay nangidayaw en sisya.

¹⁸Mo adiak inbabawi din basol ko, adi koman dinngen Diyos din adawag ko.

¹⁹Ngem siya met ay dinnge na ya sinongbatana.

²⁰Madaydayaw si Diyos tan din kararag ko et pinatgana, din adi manbalbaliw ay layad nan sak-en yan intoltoloy na.