Gesami Hea:su 66:5-20

⁵Gode Ea hamobe amo ba:la misa! Ea dunu fi amo ganodini Ea noga:idafa hamobe amo ba:la misa.

⁶E da hano wayabo bagade afadenene, bu hafoga:i soge hamoi. Ninia aowalali da Yodane Hano amo emoga degei. Amogawi, ninia da Ea hamoi amo ba:lalu bagade nodoi.

⁷E da Ea gasaga fifi asi gala ouligilala. E da fifi asi gala huluane Ea siga ba:lala. Ema lelesu dunu ilia da Ema mae lelema:ma!

⁸Osobo bagade fifi asi gala huluane! Ninia Godema nodona:di! Dunu huluane da dilia Ema nodobe nabimu da defea!

⁹E da nini gebewane esaloma:ne ouligi. Amola nini mae dafama:ne ouligi.

¹⁰Gode! Silifa da laluga gobele, noga:i amola wadela:i afafama:ne adoba:be agoane, Di da nini adoba:i.

¹¹Di da nini saniga sa:ima:ne adodigi. Di da ninia baligi da:iya dioi liligi ligisi.

¹²Di da ninima ha lai dunu ninima hasalasima:ne yolesi. Ninia da lalu gelabodili amola hano heda:i degele asi. Be wali Di da ninia gado sogebi amoga oule misi dagoi.

¹³Na da Dima gobei gobele salasu liligi amo Dia diasuga gaguli misunu. Na da Dima ilegei liligi amo Dima imunusa: olemu.

¹⁴Na da nama bidi hamosu doaga:loba, na da adi Dima imunusa: sia:i liligi, amo Dima imunu.

¹⁵Na da sibi amo oloda da:iya gobele sanasimusa: imunu. Na da bulamagau gawali amola goudi gobele salimu. Amola gobele salasu mobi da muagado heda:mu.

¹⁶Godema nodone dawa:su dunu huluane! Naba misa! Amola na da Ea nama hamobe amo huluane dilima olelemu.

¹⁷Na da Ema na fidima:ne dini i. Na da gesami hea:su Ema nodone sia:i.

¹⁸Na da na wadela:i hou banenesisa ganiaba, Hina Gode da na sia:ne gadobe hame naba:loba.

¹⁹Be Gode da dafawane na sia:ne gadobe nabi.

²⁰Na da Godema nodosa. Bai E da na sia:ne gadosu hame higa:i. Amola E da nama mae fisili Ea asigidafa hou hame gagulaligi.