لٍوِ سّرّشّدُبّ 16:11-21

¹¹هَرُنَ شَ تُورَ بَ عَ يّتّ شَ يُنُبِ شَقَرِ سّرّشّ رَ، عَ شَ قِندِ عَ تَن نُن عَ شَ دٍنبَيَ شُنسَرٍ رَ. عَ شَ نَ تُورَ كْن نَشَبَ يُنُبِ شَقَرِ سّرّشّ رَ.

¹²عَ شَ سُرَيِ فَنسٍ رَقٍ تّ وٌلٍ رَ نَشَن تٌنفٌشِ سّرّشّبَدٍ قَرِ ﭑ تَن عَلَتَلَ يَ عِ. عَ شَ سُرَيِ قُحِ بّلّشّ يَ قِرِن قَن تٌنفٌ. عَ شَ نَ بِرِن شَنِن دُفِ فبَكُشِ شَنبِ رَ يِرٍ سّنِيّنشِ كُي.

¹³عَ شَ نَ سُرَيِ فَن ﭑ تَن عَلَتَلَ يَ عِ، عَلَكٌ تُورِ نَشَن تٍمَ نَ شَ سَاتّ كَنكِرَ نْشُن عَ مَ عَلَكٌ عَ نَشَ قَشَ.

¹⁴عَ شَ تُورَ وُلِ ندٍ تٌنفٌ عَ بّلّشّسٌلٍ رَ، عَ شَ عَ كَسَن سَاتّ كَنكِرَ مَكٌتٌ سٍ مَ شُنسَرَدٍ سٌفٍتٍدٍ بِرِ سَنمَيَ سٌلٌقٍرٍ، عَ مَن شَ عَ كَسَن نَ مَكٌتٌ سٍ يَ رَ.

¹⁵عَ شَ سِكْتّ كْن نَشَبَ حَمَ شَ يُنُبِ شَقَرِ سّرّشّ رَ، عَ قَ عَ وُلِ شَنِن دُفِ فبَكُشِ شَنبِ رَ. عَ شَ نَ وُلِ كَسَن سَاتّ كَنكِرَ مَكٌتٌ سٍ مَ نُن سَاتّ كَنكِرَ مَكٌتٌ سٍ يَ رَ، عَلْ عَ رَبَشِ تُورَ وُلِ رَ كِ نَشّ.»

¹⁶«نَ كِ عَ شُنسَرٍ سْتْمَ يِرٍ سّنِيّنشِ بّ عِسِرَيِلَكَيٍ شَ سّنِيّنتَرٍحَ، عٍ شَ قٍ كٌبِيٍ، نُن عٍ شَ يُنُبِيٍ شَ قٍ رَ. عَ شَ عَ رَبَ نَ كِ هْرْ مْلِنفِرَ قَن بّ، نَشَن تِشِ عِسِرَيِلَكَ سّنِيّنتَرٍيٍ تَفِ.

¹⁷مِشِ يٌ نَشَ لُ هْرْ مْلِنفِرَ كُي هَن هَرُنَ مِنِمَ يِرٍ سّنِيّنشِ قِسَمَنتٍ كُي تّمُي نَشّ. عَ شَ عَ تَن نُن عَ شَ دٍنبَيَ شُن سَرَ، عَ نُن عِسِرَيِلَ حَمَ بِرِن.

¹⁸عَ شَ سِفَ سّرّشّبَدٍ يِرٍ نَشَن نَ ﭑ تَن عَلَتَلَ يَ عِ، عَ قَ شُنسَرٍ بَ نَ سّرّشّبَدٍ بّ. عَ شَ تُورَ نُن سِكْتّ وُلِ سَ قٍرِيٍ مَ نَشٍيٍ نُ نَ سّرّشّبَدٍ تُنشُنيِ نَانِيٍ رَ.

¹⁹عَ شَ وُلِ كَسَن عَ بّلّشّسٌلٍ رَ سَنيَ سٌلٌقٍرٍ سّرّشّبَدٍ مَ، عَلَكٌ عَ شَ سّنِيّن عِسِرَيِلَكَيٍ شَ سّنِيّنتَرٍحَ شَ قٍ رَ.»

²⁰«هَرُنَ نَ فّ شُنسَرٍ بَدٍ يِرٍ سّنِيّنشِ، هْرْ مْلِنفِرَ، نُن سّرّشّبَدٍ بّ، عَ شَ سِكْتّ بٌورٍ مَسٌ نَشَن مُ نُ قَشَ.

²¹عَ شَ عَ بّلّشّ قِرِنيِيٍ سَ نَ سِكْتّ شُن تَفِ، عَ قَ عِسِرَيِلَكَيٍ شَ سّنِيّنتَرٍحَ، عٍ شَ قٍ كٌبِيٍ، نُن عٍ شَ يُنُبِ بِرِن مَسٍن ﭑ تَن عَلَ بّ. عَ نَ فّ نَ كٌتٍ بِرِن سَدٍ سِكْتّ شُن، عَ شَ نَ سِكْتّ بّحِن وُلَ عِ مِشِ ندٍ سَابُي رَ نَشَن بَرَ تِن نَ وَلِ رَ.