1يُدَيَ مَنفّ عَشَسِ شَ وَشَتِ، نَشَن قِندِشِ يٌتَمِ شَ دِ نُن عٌسِيَسِ شَ مَمَدِ رَ، عَرَ مِ مَنفّ رٍ سِن نُن عِسِرَيِلَ مَنفّ ثٍكَ، رٍ مَلِيَهُ شَ دِ، عٍ نَشَ سِفَ دَرِ سَلَمُ فٍرٍدٍ، كْنْ عٍ مُ نْ عَ رَ.
2دَوُدَ بْنسْي مِشِيٍ تٌ عَ كٌلٌن عَ عَرَ مِكَيٍ بَرَ لَنيِ شِرِ عٍقِرَ مِ بْنسْي رَ، مَنفّ عَشَسِ نُن عَ شَ حَمَ نَشَ سّرّن فَاشُي كُي، عَلْ قٌيٍ وُرِ بِلِيٍ رَ مَشَمَ كِ نَشّ.
3نَ تّمُي عَلَتَلَ نَشَ عَ مَسٍن عَننَبِ عٍسَيِ بّ، «عِ تَن نُن عِ شَ دِ سٍيَرَ يَسُبُ، وٌ شَ سِفَ مَنفّ عَشَسِ نَرَلَندٍ يٍ رَفَتَدٍ شُنفبٍ شَنبِ رَ، كِرَ نَشَن سِفَمَ دُفِ شَمَ دّننَشّ.
4عَ قَلَ عَ بّ، ‹عِ نَشَ كْنتْقِلِ. عِ شَ لِمَنِيَ. هَلِ عِ مُ فَاشُ يِ مِشِ قِرِنيِ رَ، نَشٍيٍ لُمَ عَلْ تّ شُبٍنشِ نَشَن تُورِ تُن رَ مِنِمَ. عِ نَشَ فَاشُ عَرَ مِ مَنفّ رٍ سِن نُن رٍ مَلِيَهُ بْنسْي يَ رَ.
5عَرَ مِكَيٍ، نُن رٍ مَلِيَهُ شَ مِشِيٍ عٍقِرَ مِكَيٍ بَرَ يَنقَنتٍيَ نَن شِرِ عِ شُن مَ نَ كِ، عَ قَلَقٍ رَ،
6«وٌن شَ يُدَيَ فٍرٍ، وٌن شَ عَ يَ عِسٌ، وٌن شَ نْ عَ رَ، تَبٍيلِ شَ قِندِ عٍ شَ مَنفّ رَ.»›»
7كْنْ عَلَتَلَ شَ مَسٍنيِ نَن يَ نَ شَ قٍ رَ، «نَ مُ سْونّيَمَ، ﭑ مُ نَ رَبَمَ قٍوٌ،
8بَرِ مَ دَ مَسِ مَنفّ رٍ سِن نَن عَرَ مِ يَمَرِ مَ. حّ تٌنفٌ سٍننِ نُن سُولِ فبَنسَن نَن لُشِ، عٍقِرَ مِ بْنسْي شَ يٍنسٍن.
9سَمَرِ مَنفّ رٍ مَلِيَهُ نَن عٍقِرَ مِ يَمَرِ مَ. شَ وٌ مُ وٌ يّتّ تَشُ وٌ مَرِفِ عَلَ رَ، وٌ مُ كِسِمَ.»
10عَلَتَلَ نَشَ يِ مَسٍنيِ قَن تِ عَشَسِ بّ، عَ نَشّ،
11«عِ شَ ﭑ تَن عِ مَرِفِ عَلَتَلَ مَشَندِ تْنشُمَ مَ ﭑ مَ مَسٍنيِ شَ قٍ رَ.»
12عَشَسِ نَشَ عَ يَابِ، «ﭑ مُ سٍسٍ مَشَندِ مَ عِ مَ، بَرِ مَ ﭑ مُ وَ مَ عِ تَن عَلَتَلَ مَتٌقٍ سِيكّ كُي.»
13نَ كُي عَننَبِ عٍسَيِ نَشَ عَ قَلَ، «دَوُدَ بْنسْي، وٌ لُمَ مِشِيٍ رَتَفَن نَ، كْنْ يَكْسِ وٌ وَ مَ عَلَتَلَ نَن قَن نَتَفَنقٍ؟
14عَلَتَلَ يّتّ يَتِ قَمَ نّ تْنشُمَ ندٍ قِدٍ وٌ مَ؛ فِنّ دِ مّدِ ندٍ قَمَ تّفّدٍ، عَ دِ بَرِ، عَ نَ دِ شِلِ سَ عٍمَنُوّلِ، نَشَن قَسَرِشِ، ‹عَلَ نَ وٌن يَ مَ.›
15عَ شِحّ قّنّ نُن كُمِ نَن دٌنمَ هَن عَ مْ، عَ نْ قٍ كٌبِ نُن قٍ قَنيِ تَفِ رَبَ كٌلٌندٍ.
16كْنْ بٍينُن عَ شَ نَ سِمَيَ سْتْ، نَ مَنفّ قِرِنيِ عِ فَاشُشِ نَشٍيٍ رَ، نٍيٍ شَ بْشِيٍ قَمَ نّ كَنَدٍ.
17نَ تّمُي عَلَتَلَ قَمَ نّ فبَلٌي ندٍ رَ وٌ شُن مَ نَشَن مُ كٌلٌنشِ وٌ نُن وٌ بَبَيٍ شَ وَشَتِ كَقِ عٍقِرَ مِ عَ مَكُيَشِ يُدَيَ رَ تّمُي نَشّ. عَلَتَلَ عَسِرِيَ مَنفّ نَن شّيمَ وٌ يِرٍ.»
18نَ لْشْي، عَلَتَلَ شّيرِيٍ رَقَمَ نّ كٍلِقٍ مِسِرَ شُرٍيٍ مَ، عَ نُن كُمِيٍ كٍلِقٍ عَسِرِيَ بْشِ مَ.
19عٍ قَمَ نّ لُدٍ قٌلٍيٍ كُي، فّمّ لٌنفٌرِيٍ رَ، كُنسِيٍ قَرِ، نُن يٍ يِرٍيٍ.
20نَ لْشْي مَرِفِ قَمَ نّ عَسِرِيَ مَنفّ رَ كٍلِقٍ شُرٍ شُنفبٍ نَاكِرِ مَ، عَ شَ وٌ رَيَافِ عَ حَاشِ رَ، عَلْ مِشِ نَشَن قَتٍ مَشَبٍ بِرِن مَبِمَ.
21نَ لْشْي، مِشِ قَمَ نِنفٍ كٍرٍن نُن سِ قِرِن نَن فبَنسَن سْتْدٍ،
22عٍ شِحّ قّنّ سْتْمَ نَشَن نَ. عٍ لُمَ نَ نُن كُمِ فبَنسَن نَن دٌن نَ.
23نَ لْشْي، وّنِ بِلِ وُلُ كٍرٍن نُ نَ شّ نَشَن مَ، نَشَن سَرٍ نُ فبٍتِ كٌلٍ وُلُ كٍرٍن لِمَ، نَا قِندِ مَ نّ تُنبٍ نُن بَافِ يِرٍ رَ،
24كٌيِنمَيٍ شَلِيٍ وٌلِمَ دّننَشّ.
25شّيٍ نُ سَمَ فٍيَ نَشٍيٍ قَرِ، تُنبٍ نُن بَافِ دِنمَ نّ نَا رَ، مِشِ يٌ مُ سُو سَ سِفَدٍ نَا سْنْن. نَا قِندِ مَ شُرُ سٍيٍ مَدٌندٍ نَن فبَنسَن نَ.
