رْ مَ 3:11-27

¹¹قٍ كٌلٌنيِ يٌ مُ نَ، مِشِ يٌ مُ عَلَ قٍنقٍ.

¹²بِرِن بَرَ كِرَ قَنيِ بّحِن، عٍ بِرِن شُن بَرَ رَكَنَ. مِشِ يٌ مُ نَ نَشَن قٍ قَنيِ رَبَمَ، هَلِ مِشِ كٍرٍن، عَ مُ نَ.

¹³عٍ دّ قِندِشِ فَبُرِ دّ عِبِشِ نَن نَ، عٍ نّنيِ قِندِشِ مِشِ مَيٍندٍن سٍ نَن نَ. بْشِمَسٍ شْنّ نَن مِنِمَ عٍ دّ كِرِ رَ،

¹⁴دَنكّ نُن وْيّن شْنّ نَن عٍ دّ رَقٍشِ.

¹⁵عٍ سَنيِ شُلُن وُلِ رَ مِنِقٍ رَ،

¹⁶عٍ دَنفِ دّدّ، عٍ كَنَرِ نُن نِمِسّ نَن لُمَ عٍ شَنبِ رَ.

¹⁷عٍ مُ بْحّسَ كِرَ كٌلٌن،

¹⁸عٍ مُ عَلَ يَرَفَاشُي كٌلٌن.»

¹⁹وٌن عَ كٌلٌن عَلَ شَ سّرِيّ نَشَن بِرِن مَسٍنشِ، عَ عَ مَسٍنشِ مِشِيٍ نَن بّ نَشٍيٍ نَ عَ شَ سّرِيّ نْي بُن مَ، عَلَكٌ دّ بِرِن شَ بَلَن، سّرِيّ شَ بِرِن سُشُ عَلَ يَ عِ.

²⁰نَ كُي، عَدَ مَدِ يٌ مُ قِندِ مَ تِنشِنتْي رَ عَلَ يَ عِ سّرِيّ رَبَتُقٍ سَابُي رَ، بَرِ مَ سّرِيّ تَن يُنُبِ نَن تُن مَكّنّنمَ، عَدَ مَدِ شَ عَ كٌلٌن عَ يُنُبِتْي نَ عَ رَ.

²¹كْنْ يَكْسِ، تِنشِنيِ بَرَ مَكّنّن نَشَن مُ كٍلِمَ سّرِيّ رَبَتُقٍ مَ. عَ كٍلِمَ عَلَ يّتّ نَن مَ، عَلْ عَ سّبّشِ سّرِيّ نُن نَمِحْنمّيٍ شَ كِتَابُييٍ كُي كِ نَشّ.

²²يِ تِنشِنيِ نَشَن كٍلِمَ عَلَ مَ عَ سْتْمَ دَنشَنِيَ نَن سَابُي رَ، بِرِن عَ سْتْ نَشٍيٍ دَنشَنِيَشِ عَلَ شَ مِشِ سُفَندِشِ عِسَ مَ. عَلَ مُ مِشِ يٌ رَقِسَشِ عَ بٌورٍ بّ،

²³بَرِ مَ بِرِن قِندِشِ يُنُبِتْي نَن نَ، بِرِن بَرَ فَن عَلَ شَ نْرّ رَ،

²⁴بِرِن تِنشِنيِ سْتْمَ عَلَ شَ هِننّ نَن تُن سَابُي رَ. عَلَ عَدَ مَ كِمَ يِ تِنشِنيِ رَ وٌن شُنسَرَ مَ عِسَ نَن سَابُي رَ، عَ شَ مِشِ سُفَندِشِ.

²⁵عَلَ عَ تَن نَن قِندِ سّرّشّ رَ، عَ وُلِ رَ مِنِشِ نّ عَلَكٌ نَشٍيٍ نَ دَنشَنِيَ عَ مَ، عٍ شَ يُنُبِيٍ شَ شَقَرِ. يِ عَ مَسٍنشِ نّ عَ عَلَ تِنشِن، بَرِ مَ عَ شَ دِحّ كُي، عَ نُ بَرَ عَدَ مَدِيٍ شَ يُنُبِيٍ لُ نَ عٍ مُ مَكِيتِ، عٍ نَشٍيٍ رَبَشِ وَشَتِ دَنفِشِ.

²⁶كْنْ يِ وَشَتِ عَلَ بَرَ عَ شَ تِنشِنيِ مَسٍن عَلَكٌ بِرِن شَ عَ كٌلٌن عَ عَ تِنشِن، عٍ مَن شَ عَ كٌلٌن عَ عَ تَن نَن تِنشِنيِ قِمَ مِشِ مَ نَشَن دَنشَنِيَشِ عِسَ مَ.

²⁷نَ كُي، مِشِ قَ عَ يّتّ عِفبٌمَ مُنسٍ شَ قٍ رَ؟ قٍقٍ! مُنقٍ رَ؟ مِشِ نْمَ عَ يّتّ مَتْشْدٍ عَ تٌ دِينّ سّرِيّ رَبَتُشِ؟ عَدٍ، بَرِ مَ تِنشِنيِ سْتْمَ دَنشَنِيَ نَن تُن سَابُي رَ.