Romu 3:11-27

¹¹Inɛ ɡɔ kù wɛɛ iyi í nɛ bisi. Inɛ ɡɔ kù nɔ kù wɛɛ iyi wɑ dɛ Ilɑɑɔ̃.

¹²Inɛ fei í nyɔi, Inɛ fei í bɛjɛi. Inɛ kɑ̃mɑ kù wɛɛ iyi wɑ ce jiidɑ bɑɑ ɑkɑ̃.

¹³Idei ɡɛlɛ nŋɑ í sɑ̃mi bɛi bɑlɛ foo, Nɔ í nɛ ɑcĩ bɛi njo. Do idei ɡɛlɛ nŋɑui ɑ̀ yɑ tɑkiò inɛ ŋɑ.

¹⁴À nɛ inɔ kuro nɔ ikpei wɑ kɔ̃ si ɡɛlɛ nŋɑ.

¹⁵Kutɛ ɡbɑ̃ɑ ku kpɑ inɛi ɑ̀ nɛ.

¹⁶Bii ɑ̀ bɔ fei idei kukpɑ do inɔ kufɔi ɑ̀ yɑ jɔ̀ bɛ.

¹⁷A kù mɑ̀ kpɑ̃ɑi lɑɑkɑi ku sũ.

¹⁸A kù nɛ njoi Ilɑɑɔ̃.

¹⁹Ammɑ ɑwɑ ɑ̀ mɑ̀ iyi mii iyi woodɑ wɑ fɔ fei, inɛ ŋɑ iyi woodɑu í kɑ̃i wɑ fɑ̃ɑ. Woodɑ í wɛɛi ku bɑ ɡɛlɛ kɑ̃mɑ ku mɑɑ̀ nɛ iyi ɑ́ fɔ, nɔ inɛ fei ku mɑ̀ iyi Ilɑɑɔ̃ wɑ yɛ tɑɑleɛ.

²⁰Ntɔ ntɔ inɛ kɑ̃mɑ kù wɛɛ iyi ɑ́ yɔkɔ ku jirimɑ woodɑ hee koo jɛò dee dee si wɑjui Ilɑɑɔ̃. Woodɑ í wɛɛi ku bɑ ku jɔ̀ ɑmɑnɛ ku mɑ̀ iyi nŋu í jɛ ilu dulum.

²¹Ammɑ nsɛi, Ilɑɑɔ̃ í nyisi wɑ yɑɑse bɛi nŋu í yɑ ce ɑmɑnɛ dee dee, kù jɛ do idei woodɑ. Woodɑi Moizi do wɑliii Ilɑɑɔ̃ ŋɑu ɑ̀ jɛ sɛɛdɑɛ.

²²Inɛ ŋɑ iyi ɑ̀ dɑsi Jesu Kirisi nɑɑnɛ fei, Ilɑɑɔ̃ í ce ŋɑ dee dee nɑ nɑɑnɛ iyi ɑ̀ dɑsiu. Inɛ ɡɔ kù jɛ ikɑ̃,

²³domi inɛ fei í ce dulum nɔ ɑ̀ kuɑ ɑmboei Ilɑɑɔ̃.

²⁴Ammɑ Ilɑɑɔ̃ í ce ŋɑ dee dee hɑi nɛ nɡɔɡɔ ku sɑ̃ nɑ didɔ̃ɛ do sɑɑbui Jesu Kirisi iyi í yɑ ŋɑ.

²⁵Nŋui Ilɑɑɔ̃ í jilɛ ku jɛ kuwee. Njɛɛ iyi í nikɑ̃ í kpɑ dulum dii inɛ ŋɑ iyi ɑ̀ dɑsiɛ nɑɑnɛ. Ilɑɑɔ̃ í ce bɛɛbɛi ku nyisiò iyi nŋu í jɛ dee dee. Tɑko wo si suuruɛ í temuɑ do dulum dii ɑmɑnɛ ŋɑ, kù kpɑ̃ ŋɑ iju.

²⁶Ammɑ si dee dee ku jɛɛ wɑ nyisi wɑ si wɑɑtii nsɛiu ihɛ̃ iyi nŋu inɛ dee deei, nɔ nŋu wɑ ce inɛ ŋɑ dee dee nɑ nɑɑnɛ iyi ɑ̀ dɑsi Jesu.

²⁷Debɛi, ɑ̀ nɛ kpɑ̃ɑ iyi ɑɑ kɑ tɔɔ fufu mɑ́? Aɑwo, kɑɑ ce. Nɑ mii. Si nɑ iyi í jɔ̀ kù jɛ woodɑ ku jirimɑi ɑ̀ wɑɑ kɑ, bii kù jɛ nɑɑnɛ ku dɑsi.