Rom 3:11-27

¹¹Goa pua kone makuaae onaa rayo ora padane-daa napimi. Onaa meda Gote aasa pulalo napimi.

¹²Onaa rayome Gote masaa rilaawa ora pa-rupa piruaeme. Onaa rayome ora wae yae pu pimi. Ora padaneme page epe kogono napea.

¹³Nimumi agaa teme rabu matmat-para rogaaemede aa rona pugu pi-rupa agaa teme. Nimumi wae kone sua ora wae makirae agaa teme. Nimumi wae agaa teme rabu mugununa eke mua teme.

¹⁴Nimuna agaame ne wae rero pi agaare robaa-para rulatabea.

¹⁵Nimumi aloma puare onaanu radaa mapaawa tu maomaatalo peme.

¹⁶Oro yaalo pora-nia pameme rabu nimumi oyae maoyaawa wae kedaa kateme.

¹⁷Nimumi epe-rupa pirape pora na-ademe.

¹⁸Go pua nimumi Gote madaa paalame naomeme.

¹⁹Gore Gote-me onaanu-para nipuna rekena isade pepa kasa-pulu go onaanumi rekena agaa mogealiminalo gisa. Goa pea-ga su amaa piri onaa rayome Gote-na ini agaa madaa pa agaa mada na-abuteme. Dia go rekena agaame onaa rayo Gote-na koso lape agaa pagaliminalo mea gisa.

²⁰Gote-na rekena agaa mogealia-pulu go aare Gote-na ini agaa madaa redepo ne aa-rupa napia. Dia, rekena agaana kogonore aa medame pupitagi nalia-daare mea waatea.

²¹Pare Gote-me onaanu maredepo yaalia rabu go porare ora rekena agaana kogono-daa dia. Moses-me rekena agaa tisa rabu page Gote-na agaa lakene aanumi agaa lakesimi rabu page nimumi Gote-na maredepo ne kone madaa tisimi.

²²Onaanumi Yesu madaa kone rulaeme-pulu Gote-me nimu maredepo yaaya.

²³Onaa rayome pupitagi neme-pulu nimumi Gote-na oro yaalo mapiraape kone na-ademe.

²⁴Pare Gote-me epe raba meape kone sua onaanu esepe maredepo yaasa-pulu nimu Yesu Krais raapu epe-rupa mapiraasa. Goa pea-pulu nipumi nimu madaa natalia.

²⁵Gote-me Yesu mea rapaasa rabu niaana kone kedaa omenalo gisa. Go rabu niaame Yesu madaa kone rulalima rabu niaana wae yae mea rubalia. Onaanumiri Gote-me Yesu mea gisare onaanu nipu raapu epe-rupa pirinalo pisa. Abadere Gote-me pawa pirua onaanuna wae yaenu pa adaba pirisa.

²⁶Pare abia Gote-me onaanu nipu raapu epe-rupa mapiraainalo niminaaeme-pulu Gote-me onaana wae yaenu waru adea. Goa pea-ga Gote-me nipuna epe redepo ne kone mea waatea. Goa pua onaa rayome Yesu madaa kone rulalimiri nipumi go onaanu maredepo yalia.

²⁷Goa pea-daa niaa Juda aanu akeane agaa adaapu tema ya? Niaa rekena agaa mogealima rabu niaame agaa adaapu mada tema ya? Dia, pare niaame Gote madaa kone rulaema rabu agaa adaapu mada tema.