Guiꞌch par ree bén Rom 3:11-27

¹¹Achutczi rigniaꞌ. Achutczi raguiil Dios.

¹²Gra reeman ma basaꞌn xnejz Dios. Gra reeman ma zinal nejz mal. Achutczi cayüjn ni zagdxe, per niꞌczi tijb bejn.

¹³Ziꞌcgajczi tijb baa ni zojbyal, zian ganax ni dxuudx ririi roꞌ reeman. Ganax diidx rusquiee rniee reeman. Abiꞌ xtiidx reeman na̱j ziꞌc xvenen bëël.

¹⁴Ganax diidx mal ririi roꞌ reeman, diidxguijdx ni rüjnnaa lasaꞌ reeman.

¹⁵Zaꞌsin reeman din gugüjt reeman bejn.

¹⁶Bantëëz guin zë reeman, rüjn reeman ni dxuudx ree. Abiꞌ rusagzi reeman bejn ree.

¹⁷Ad nünbee tëët reeman xhienaag na̱j guialrbajn bejn zagdxe.

¹⁸Ad yuꞌguijct reeman guial rayal guidxeb reeman Dios.

¹⁹Dunuj ree rayagbee guial gra ni zëëd loj xley Dios, na̱j par ree bén zinal ley guin, chitëë chu guiëb guial achut ragbee xhienin na̱j dol, laan na̱j par gagbee bejn guial najman béndol loj Dios.

²⁰Din ad guial güünt bejn gra ni rniabee ley guin ma nayaman loj Dios, ley guin rulüü din gagbee bejn guial najman béndol.

²¹Per yan Dios ma balüü dunuj ree tijb nejz guial xhienaag yayajc ree naya lojman. Ad guial yaguieentzi ree ziꞌc rniabee ley guin, por ley guin në por ni bacaa ree bén badëë xtiidx Dios loj ree bejn.

²²Rayagbee ree guial rüjn Dios bejn cwent ziꞌc bén ad yuꞌt xtol por guialrliladxaman Jesucrist, din par Dios tiblojzi na̱j bejn.

²³Din gra bejn ma been dol, achutczi naya niz loj Dios.

²⁴Per guial najman benzaꞌc, ma beenman perdon dux tol ree sin guial yadijx ree, ma nayajc ree perdon por Jesucrist, bén gudix por dux tol ree chi gütaman loj crüjz.

²⁵Dios guxhaal Jesucrist, din por xrejnman chuꞌ perdon par bénguidxliuj. Abiꞌ perdon guin na̱j par ree bén rliladx Jesucrist. Zian rguien guial graczi rüjn Dios xnejz, abiꞌ bal guiaꞌxchej ad beent xguialguxtisaman por dol ni been ree bejn, laan na̱j por pacens ni rajpaman con bejn,

²⁶guial ma ragbeeman goc güün xguialguxtisaman. Zian rusnuu rulüüman guial graczi rüjnman xnejz, zeel rüjnman perdon xtol ree bén rliladx Jesucrist.

²⁷Yan, ¿xhienaag yaguieen ree nabë? Achet yaguieennëꞌ ree nabë, din ad guial yaguieent ree ley guin cumplid ma nayajc ree perdon, yayajc ree perdon por guial yaliduladx ree Jesucrist.