Ŋicwofuŋ I 9:1-10

¹Eme Salomo e Wofuŋte fic mecne, e jahacne erific mecne â ficwiac gâcne baocte maŋkewec sâc i batara‐fârewec.

²Eme Wofuŋzi mârâc Gibeoŋ haeo Salomo fuacnewec irec sâc mocwâc fuacnewec.

³Ehuc dâŋ kecʒiŋuc âzâcnewec: “Go nore maio wira wâwâsic emeŋ i manapo. Eme go nore ʒâŋe fosanaŋkeocte fic bameŋ i jambuŋkepo, irec maŋʒâŋe‐nane ira râepe raŋɋa raŋɋa forahuc juzejec sanaŋ.

⁴Eme go mamacge Dawidizi nore maio juwec irec sâc siocmâc â tiŋne juhuc noni dâŋsanaŋ â mumutâc dâŋnane reŋkeniŋte râe‐ŋarepo i reŋke‐fârecmuo

⁵noni ŋicwofuŋ ŋeŋege basanaŋkepe Israe kikefuŋ raŋɋa raŋɋa ŋicwofuŋ jujarecmu. Noni mamacge Dawidi kecʒiŋuc âzâcnepo irec sâc fuaocmu: ‘Go ŋic moczi Israere eri ŋeŋeo ŋeocte moc mi basa‐jâmbâŋkecmu.’

⁶Ŋoŋe me ɋâricfâc‐ŋeŋic ŋoŋe ine râpecnuhuc sâcmutâc me dâŋsanaŋ‐nane râe‐ŋarepo i mana rereŋ mi ehuc rarâ nemu gâcne numu‐jarehuc kiŋaŋ qajareniŋmuo

⁷ine noni Israe kikefuŋ mâreŋ tahac‐ŋopapo irecnec bâsirowec‐ŋopapemu, erâ ufuŋ ʒira nore ʒâŋe biŋe foocte mutiripo i mai‐naneonec tuŋkepe raocmu; eme ŋic gurune gurune jaŋe Israe ŋic ŋoŋerao iticnehuc mu qâqiŋ dâŋ â mu âke sisic dâŋ eŋareniŋmu.

⁸Eme fic sesuctac fuame jâuruniŋmu sâc jaŋe bipic tatara ejareha sisi fufuŋgaŋ ehuc ʒiŋuc mu wioc eniŋmu: ‘Wofuŋzi wemocte hae mâreŋ â ufuŋ ʒi wiac iŋucne ejactewec?’

⁹Jaŋaczia iŋuc wiohuc ʒiŋuc munʒoŋgopieŋ: ‘Jaŋe Wofuŋ Anutu‐jeŋiczi kâcɋenefâc‐jeŋic Aigita mâreŋkonec jowac‐jopa wefuwec e beherâ nemu gâcne jaŋerao qohotarâ numu‐jarehuc kiŋaŋ qajarembiŋte Wofuŋ Anutu‐jeŋiczi wiac hâhâwicne keci sasawa bâfua‐jare‐fârewec.’”

¹⁰Eme Salomo e fic jajahec, Wofuŋte fic â e jahacne fic i jara 20 sâko baku batara‐fârewec.