Ŋicwofuŋ I 6:8-36

⁸Ficʒuhuc juwicnere motâc i fic fâreopec domawec, eme irecnec riri oorâŋ râreckehuc bakicne i feŋgaŋne ʒâʒâŋiŋko fewec, eme irecnec riri moczi feŋgaŋne faicpec fewec.

⁹Salomo e iŋuc ehuc fic baku bafârerâ fic tapane ine jâmâzâc jâczi bawec.

¹⁰Erâ e fic orâŋkehuc ʒuʒuhucne bafârewec wâc, feŋgaŋne moc i hâŋne‐ticne kubi 5, erâ fic i jâmâzâc â wetejâczi basanaŋkewec.

¹¹Eme Wofuŋte dâŋ Salomorao kecʒiŋuc fuawec:

¹²“Ŋoŋe dâŋsanaŋ‐nane bâninipehuc mumutâc â sâcmutâc dâŋnane mana rereŋ erâ hata mutâcne‐ŋarepo sâc wiac ebac efâreniŋmuo ine no go â mamacge Dawidi findaŋdâŋ ŋasapo i mupe fârio qaocmu.

¹³Ehame no Israe ŋicfâc‐nane ŋoŋere ŋondeŋko juhuc moc mi behec‐ŋopapemu.”

¹⁴Eme Salomo e Wofuŋte fic baku bâzickewec.

¹⁵Eme ɋâriŋkonec fuŋkerâ feku faic tapanao fisiwec fic sâpene i jâmâzâc paraŋzi foŋke‐fârerâ ɋâriŋne i wete paraŋzi bârârâŋnewec.

¹⁶Eme ficmaŋne râpenaopec ira jâmâzâc paraŋzi ficmaŋne moc âke tâcnewec, i sâcticne kubi 20. Paraŋ‐ticne i ɋâriŋkonec feku fic tapanao iticnewec. Ficmaŋne izi furu dindiŋ hâcne.

¹⁷Eme ficmaŋne irecnec ficmaŋne fârine ʒuhuckerâ rawec i sâcticne kubi 40.

¹⁸Ficmaŋne i jâmâzâc paraŋzi foŋke‐fârekicnere qânâ hohonene moc mi ewec. Eme jâczi hândâŋ qarâ fâuckeme âri fuaekac irec sâc hawari paraŋko metâ barakicne.

¹⁹Eme Wofuŋte ʒâʒâfic katapa irec ŋeŋe hae fuaocte ficmaŋne râpenaopec furu dindiŋ irec maŋne âke tâcnewec hâcne.

²⁰Ficmaŋne irec ʒoricne â otecne kubi 20, â hâŋnere kubi 20 jaha. Eme irec paraŋ i gol findowakicnezi foŋke‐fârewec erâ ficmaŋne irec motâc fuŋnao ira jâmâzâc jâczi alata moc barâ râewec.

²¹Erâ Salomo e ficmaŋne i gol findowakicnezi foŋke‐fârerâ furu dindiŋ irec mainao kâpâcwâru moc golzi bakicne i fârewec.

²²Ine hâcne ficmaŋne sasawa i golzi foŋkeku foŋke‐fârewec. Erâ alata furu dindiŋte motâc fuŋnao ŋewec i golzia wâc foŋkewec.

²³Eme furu dindiŋte biŋe kerubim jajahec jahere hawari i oliwa jâczi bacjofawec. Ʒoricne‐jekicte sâc i kubi 10.

²⁴Eme kerubim mocte fakec ŋifec â ŋifec i kubi 5. Irec fakec jajahec jahere sâc i kubi 10 ewec.

²⁵Eme kerubim moc ere sâc i kubi 10 jaha. Kerubim jajahec jahere sâc â hawari mocjaha.

²⁶Â ʒoricne‐jekicte sâc i wâc mocjaha, kubi 10.

²⁷Kerubim jajahec i furu dindiŋ ʒâʒâŋiŋnao râec‐jofame domapic. Eme kerubim jahere fakec qaratierâ domapic irec mocte fakec ŋifeczi ficsâpe ŋifecne âke uawec â mocte fakec ŋifeczi sâpe ŋifecne âke uawec wâc. Â fafakec jahec‐jekiczi ʒâʒâŋiŋko bâbâfuac epic.

²⁸Eme kerubim jahec i golzi foŋjofawec wâc.

²⁹Eme Salomozi mume metâ bapa jaŋe fic sâpene sasawa i kerubim â hâmujâc erâ âri wiac irec hawari bapie sâcke‐fârewec, i furu dindiŋ ira mecne â furufic ira wâc mâmâc.

³⁰Erâ mume furu dindiŋ â furufic irec ɋâriŋ i golzi foŋke‐fârembiŋ.

³¹Furu dindiŋte motâc i mume oliwa jâczi bambiŋ. Kataŋ‐ticne jajahec â wâtuŋ wiac‐ticne i ba akic epie tikine 5 ewec.

³²Ine hâcne, motâc kataŋ jajahec i oliwa jâczi bakicne, eme jahere faio ine kerubim â hâmujâc erâ âri wiac irec hawari metâ barâ golzi foŋke‐fârembiŋ.

³³Eme mume tiri ufuŋte motâc irec wâtuŋ i oliwa jâczia bambiŋ wâc, wâtuŋ irec tikine 4.

³⁴Â motâc kataŋ jahec‐ticne i mume wete paraŋzi bambiŋ, eme kataŋ moc e ki otec‐ticne jajahec â kataŋ moc e iŋuc jaha bambiŋ.

³⁵Erâ mume kerubim â hâmujâc erâ âri wiac irec hawari metâ bapie hawarine fuawec sâc golzi foŋke‐fârembiŋ.

³⁶Eme ufuŋ râreckerâ hae ʒoŋa piticne fowec i qânâ he akic ekicne feŋgaŋne 3 â jâmâzâc jâc feŋgaŋne wâŋ iŋuc râerâ bambiŋ.