1. King 6:8-36

⁸Iwe, ewe asamen tolong lon ewe aeuin sässär a nom peliörün ewe imwenfel. A wor eu latö seni ewe aeuin sässär tori ewe aruuen sässär, pwal seni ewe aruuen sässär tori ewe aülüngatin.

⁹Iei usun Salomon a aüetä ewe imwenfel o awesala. A aea irälap me pap seni ewe irä setar le tenchoni ewe imw.

¹⁰Iwe, ükükün tekian lefilen eu me eu kewe ülüngat sässärin ewe pwalang mi nom ünükün ewe imwenfel fisu esop fiit, ra pach ngeni ewe imwenfel ren irälap seni ewe irä setar.

¹¹Iwe, ewe Samol mi Lapalap a üreni Salomon,

¹²“Are kopwe aleasochisi ai kewe allük me pwüüng, pwe kopwe apwönüretä o föri pwüngür, mürin üpwe apwönüetä ngonuk ai pwon üa fen pwon ngeni Tafit semom we.

¹³Iwe, üpwe imweimw lon ei imwenfel ka aüetä lein nei kewe aramasen Israel, nge üsap likitirela.”

¹⁴Iei usun Salomon a aüetä ewe imwenfel o awesala.

¹⁵A ccheni etippen lon ewe imwenfel ngeni pap seni ewe irä setar, seni fan tori tenchon. Nge lon ewe imwenfel a aea pap seni ewe irä saipires.

¹⁶Nge lesopuchikin ewe imw me lon a refiela eu rum ükükün langataman ilik fiit o ccheni seni fan tori tenchon ngeni pap seni ewe irä setar. Ei rum a iteni rum mi unusen pin.

¹⁷Iwe, ewe rum sosowun ewe rum mi unusen pin ükükün langataman wone fiit.

¹⁸Nge ekewe pappen lon ewe imwenfel seni ewe irä setar a rup wor liosun pamkin me pön irä mi mas. Unusen lon ewe imwenfel a cchech ngeni pap seni ewe irä setar, pwe esap wor eföü fau a pwäwu.

¹⁹Salomon a amolätä ewe rum mi unusen pin sosolong, pwe epwe iseis lon än ewe Samol mi Lapalap we pworofel.

²⁰Iwe, ewe rum mi unusen pin ükükün langataman ilik fiit, ükükün chölapan ilik fiit, nge ükükün tekian pwal ilik fiit. Salomon a apacha kolt mi mürina ngeni unusen lon ewe rum. A pwal föri eu rongen asor seni ewe irä setar.

²¹Salomon a pwal apacha kolt mi mürina ngeni unusen lon ewe imwenfel o rietä sein seni kolt ngeni ewe lenien tolong lon ewe rum mi unusen pin mi fen kapachetä kolt won.

²²Iwe, a apachätä kolt won unusen ewe imwenfel me lon tori a kuula. A pwal apachätä kolt won unusen ewe rongen asoren ötüöt mi nom mwen ewe rum mi unusen pin.

²³Iwe, a föri uluulun ruoman kerop seni ewe irä olif o anomuur lon ewe rum mi unusen pin, langatamen eman me eman leir ükükün engol me limu fiit.

²⁴Eman me eman leir a wor ruofoch pöükässin, nge efoch me efoch pöükäs ükükün langataman fisu esop fiit. Nge seni ülülen efoch pöükäs tori ülülen pwal ewe efoch ükükün engol me limu fiit.

²⁵Iwe, pwal ewe eman kerop ükükün langataman engol me limu fiit. Ir me ruoman kewe kerop a nönnöfengen kaükür me lapalaper.

²⁶Iwe, ükükün langatamen eman me eman kerop engol me limu fiit.

²⁷Salomon a anomu ekewe uluulun kerop lon ewe rum mi unusen pin me lon ewe imwenfel. Nge pöükässin ekewe kerop ra meresila, pwe efoch pöükässin ewe eman a küw ewe etip me epek, nge efoch pöükässin pwal ewe eman a küw pwal etippen ewe epek. Nge pwal pöükässir kewe ruofoch ra itifengen me lukalapen ewe imwenfel.

²⁸A pwal apachätä kolt won ekewe uluulun kerop.

²⁹Iwe, Salomon a ruputi liosun kerop me irä palm pwal pöön irä mi mas won etippen pwelin unusen ewe rum mi unusen pin me ewe rum mi pin.

³⁰A pwal mwo nge pwölü ngeni kolt lon ewe rum mi unusen pin me ewe rum mi pin.

³¹Salomon a föri ruu asam fän iten ewe lenien tolong lon ewe rum mi unusen pin seni ewe irä olif. Nge lapalapen irän penkasamer a wor limu ininin.

³²Iwe, won ekewe ruu asam mi för seni ewe irä olif a ruputi liosun kerop, irä palm me pön irä mi mas. A apachätä kolt won ekewe asam, pwal won ekewe liosun kerop me irä palm.

³³Salomon a pwal föri üren penkasamen ewe lenien tolong lon ewe rum mi pin seni ewe irä olif, nge tekian me chölapen ewe lenien tolong ra wewefengen.

³⁴A föri ruu asam seni ewe irä saipires, nge eu me eu kewe asam ra tongeni num fän ruu.

³⁵Iwe, a ruputi wor liosun kerop, irä palm me pön irä mi mas o apachätä kolt wor.

³⁶A pwal senätä tittin ewe leni mwen ewe imwenfel won ülüngat sässär ren fau mi fal, pwal eu sässär ren ewe irä setar.