Ŋicwofuŋ I 22:1-31

¹Siria ŋic â Israe ŋic jaŋe jara jahec â moc rârâsi tâmiric jumbiŋ.

²Juku jara jahec â moc eha Juda ŋicwofuŋ Josafatazi Israe ŋicwofuŋtao wahawec.

³Eme Israe ŋicwofuŋzi kiŋaŋ qaqafâcne jazarâ muwec, “Ramoti‐Gileade hae i nâŋâcne hae i ŋoŋe manaŋgopieŋ me? Eme nâŋâc Siria ŋicwofuŋte meonec mi roro mâc iŋuc niniŋkerâ junaŋmu me?”

⁴Iŋuc murâ Josafata ʒiŋuc wiocnewec: “Go Ramoti‐Gileade haeo ʒika qazo mâmâc ranacmu me?” Iŋuc mume Josafatazi Israe ŋicwofuŋ dâŋ ʒiŋuc bâtikiecnewec: “Wiac sasawa fonarekac i gore biŋe jaha; no nahacne mecne, ŋicfâc‐nane mecne â becâsicfâc‐nane mecne nâŋe gore hâcne.”

⁵Josafatazi iŋuc murâ Israe ŋicwofuŋ ʒiŋuc âzâcnewec: “Qanaŋ Wofuŋtaonec dâŋ manazore mu wioc ezemec.”

⁶Iŋuc mume Israe ŋicwofuŋ e porofete 400 heririŋ hetumaŋ‐joparâ ʒiŋuc wio‐jarewec: “No Ramoti‐Gileade haeo ʒika qazo rapemu me behepemu?” E iŋuc wiome jaŋe ʒiŋuc âzâcnembiŋ: “Sâcne rac, Wofuŋzi megao râeocmu.”

⁷Jaŋe iŋuc mupie Josafatazi muwec, “Ʒira Wofuŋte porofete moc juŋgopieŋko jaŋerao wâc mu wioc moc enʒapeŋ me?”

⁸Iŋuc mume Israe ŋicwofuŋzi Josafata ʒiŋuc âzâcnewec: “Ʒira ŋic moc jukac e Imilare ŋokâ ʒâŋene Mikaja, erao mupene eki sâcne Wofuŋ mu wioc ecneocmu. Erâ ine no ere takicnuekac; e nore findaŋdâŋ biaŋne moc mi muhuc wiac sâqocnere sawa muekac.” Iŋuc mume Josafatazi muwec, “Ŋicwofuŋ go iŋuc mac mi muc.”

⁹Iŋuc mume Israe ŋicwofuŋ e micne moc hefârerâ ʒiŋuc âzâcnewec: “Go picpac jaha rarâ Imila ŋokâ‐ticne Mikaja jowa warec.”

¹⁰Eme Israe ŋicwofuŋ â Juda ŋicwofuŋ Josafata jahe Samaria haere sacmotâcko ŋicwofuŋ ŋaqi‐jekichec eri ŋeŋe‐jekicko ŋehapire porofete jaŋe maŋfuŋ‐jekicko domahuc findaŋdâŋ mumbiŋ.

¹¹Ehame Kenanare ŋokâ Zedekia e jahac aeŋzi ʒuŋe bafârerâ muwec, “Wofuŋ e ʒiŋuc mukac: ‘Wiac ʒiŋucnezi Siria ŋic sâcne hecjopaku hemiziec‐jopaniŋmu.’”

¹²Eme porofete jaŋe ijaha mufârehuc mumbiŋ, “Ajoc, Ramoti‐Gileade haeo rarâ aŋac ʒeri bâfuac. Wofuŋzi hae i ŋicwofuŋ gore meo râeocmu.”

¹³Eme kiŋaŋŋic Mikaja jowaocte rawec e ra fisirâ ʒiŋuc âzâcnewec: “Manakic, porofete jaŋere dâŋzi sâc mocjaha efâreme ŋicwofuŋtao biaŋkekac. Irec gore dâŋzi jaŋere dâŋte sâc jaha ehame mutec sâckezejec.”

¹⁴Iŋuc mume Mikajazi muwec, “Wofuŋ e jujâmbâŋkekacte dâŋ nazaekac sâc jâmbâŋ mupemu.”

¹⁵Iŋuc murâ ŋicwofuŋtao fisime ŋicwofuŋzi ʒiŋuc âzâcnewec: “Mikaja, nâŋe ʒika qanaŋte Ramoti‐Gileade haeo ranaŋmu me behenaŋmu?” Iŋuc mume dâŋ ʒiŋuc bâtikiecnewec: “Go rarâ aŋac ʒeri bâfuac; Wofuŋzi hae i gore meo râeocmu.”

¹⁶Iŋuc mume ŋicwofuŋzi âzâcnerâ muwec, “Goki dâŋ burec mi ehuc Wofuŋte ʒâŋeo dâŋ fârinea nazacmurâ dameŋ bocjaha gazaekopac.”

¹⁷E iŋuc mume Mikajazi ʒiŋuc muhuc âzâcnewec: “No Israe ŋic honec‐jopape lama soŋaŋ tâmiric iŋucne tikio siaŋ siperec qambiŋ. Iŋuc epie Wofuŋzi kecʒiŋuc muwec: ‘Ŋic ʒi jaŋe bomboŋ tâmiric; irec wamao hae‐jeŋic sâc risienʒepieŋ.’”

¹⁸Mikaja e iŋuc mume Israe ŋicwofuŋzi Josafata dâŋ kecʒiŋuc muhuc âzâcnewec: “E nore findaŋdâŋ biaŋne moc mi muhuc wiac sâqocnere sawa muekac i mi gazapac me?”

¹⁹Iŋuc mume Mikajazi muwec, “Ʒi ine Wofuŋte dâŋ manac: No Wofuŋ e eri ŋeŋe‐ticnao ŋeme honehape sambâŋko guru dindiŋ jaŋe gâjoŋne ŋifec â ŋifec doma rambiŋ.

²⁰Ehame Wofuŋzi muwec, ‘Mozi Ahaba doc bame rarâ Ramoti‐Gileade haeo ʒikao ferâ hâmoocmu?’ Eme moczi dâŋ moc muwec â moczi moc muwec.

²¹Ehame mâro moczi fuarâ Wofuŋte maio domahuc muwec, ‘Noni doc bapemu.’

²²Iŋuc mume Wofuŋzi wiocnerâ muwec, ‘Wemo wiaczi doc bacmu?’ Mume muwec, ‘No fuarâ porofetefâcne jaŋere micko eeatuc mâro moc epemu.’ Mume Wofuŋzi muwec, ‘Goki hâcne doc batec fârinehec ezejec, irec fuarâ iŋuc ec.’

²³Eme irec ʒiŋuc manac: Wofuŋzi porofetefâcge ʒi jaŋere micko eeatuc mâro moc râewec. E gorao wiac repicne fuaocte mupaŋkewec hâcne.”

²⁴Iŋuc mume Kenana ŋokâ‐ticne Zedekiazi Mikajare maŋfuŋko rarâ maucnao qahuc muwec, “Wofuŋte mâro e go dâŋ gazaocte noraonec weniŋuc jaha gorao fâjec?”

²⁵Eme Mikajazi muwec, “Manakic, go soŋkezore ficmaŋ ʒâʒâŋiŋko raʒicmu dameŋ ira ʒâŋe fârigezi honecmu.”

²⁶Iŋuc mume Israe ŋicwofuŋzi muwec, “Ajoc, Mikaja rorâ hae ʒirec mâreŋ soŋaŋ Amoŋ â ŋicwofuŋte ŋokâ Joasi jaherao baraniŋ.

²⁷Ehuc ʒiŋuc munʒepieŋ: ‘Ŋicwofuŋ e kecʒiŋuc mukac: “Ŋic ʒi kâpâcwâru ficko râerâ nânâ afecne mac gumehuc juhapie sahac furu risiezepac.” ’”

²⁸Iŋuc mume Mikajazi muwec, “Go sahac furu risiecmu me mâcne irec dâŋ moc Wofuŋzi nore micko mi râewec.” Iŋuc murâ ʒuhuckerâ muwec, “Ŋic ŋokac sasawa ŋoŋe dâŋ i mananiŋ!”

²⁹Eme Israe ŋicwofuŋ â Juda ŋicwofuŋ Josafata jahe Ramoti‐Gileade haeo rapic.

³⁰Ehuc Israe ŋicwofuŋzi Josafata âzâcnerâ muwec. “No hawari‐nane hetikierâ ʒikao rapemu â goki ine ŋicwofuŋ ŋaqige rojuzemec.” Iŋuc murâ Israe ŋicwofuŋ e hawari‐ticne hetikiewec. Eme ʒikao rambiŋ.

³¹Eme Siria ŋicwofuŋ e keretacfâc‐ticne jaŋere micne 32 jaŋe ʒiŋuc jazawec: “Ŋoŋe ŋic fekicne wahakicne mi jopahuc Israe ŋicwofuŋ e sawa qanʒepieŋ.”