1 Reyes 22:1-31

¹Siria-dulemar, Israel-dulemargi birgapaa bila-onossur gusmalad.

²Geb birgapaa-nasgu, Judá-e-rey-Josafat, Israel-e-rey-Acabʼse ataknad gusad.

³Agine, Israel-e-rey e-sordaganga sogded: “¿Ar be wissurmarsi, Ramot-De-Galaad-neggwebur-naid anmargadi? Degite, Siria-e-rey-annik anmar gannar we-neggwebur-suega ibmar imaksulid.”

⁴Degisoggu, Rey-Acab, Josafatʼga sogded: —¿An Ramot-De-Galaadʼgi bila-ononaye sogele, be anba nadele? Josafat abin-sogded: —Eye. An-sordamar, be-sordamarmogad, an-molimarse-bakar, guakwa-nanaid.

⁵Agine, Josafat, Israel-reyga sogdebalid: —Degi-inigwele, a-iduale, Bab-Jehováʼse be idakgwelergebed.

⁶Degisoggu, Israel-e-rey, Bab-Dummad-gayaburba-barsogmalad e-dulataled-ilabake (400) onmaksad, amarse egisded: —¿Ramot-De-Galaad-neggweburse an bila-ononaed be an-itomoga? Rey-abin sogdemalad: —Be bila-ononae, ade, Bab-Jehová bega urmakoed.

⁷Josafat, Acabʼga sogdebalid: —¿Bab-Jehová-gayaburba-barsoged-baid wegi gudisuli? Adi, anmar ase idakbaligar.

⁸Israel-e-rey-Acab, Josafat-abin sogded: —Wegine, Bab-Jehová-gayaburba-barsoged-wargwen gudiid. A-dule, Imla-machid, Micaíasʼye nugad. Sunna anmar ase idaksabaliled. Degi-inigwele, we-dule, an-isdaradid. Ade, ibmar-nued anga sogdasulid, unnila boniganse anga gotedaed. Josafat Israel-e-reyga sogdebalid: —Mer deyob sunmake.

⁹Agine, Israel-e-rey e-sorda-gwensakse goted, ega sogded: “Emisgwa anga Imla-machi-Micaías sedago.”

¹⁰Israel-e-rey, degi, Judá-e-rey-Josafatʼbogwa, Samaria-neggwebur-noedgi ibmar-gwag-omukuleged-neg-siid-asabin simalad. E-rey-ganmargi na simalad. Aginbali, e-reymor-yoi-yoi simarbalid. A-reymar-ebogwad-asabinni, Bab-Dummad-gayaburba-barsogmalad, Bab-Dummad-gayaburba-barsognai guarmalad.

¹¹Quenaana-machi-Sedequías, moli-bebeyob esgoro sobsad. Iseedi gornai gusad: “Weyob Bab-Jehová sogye: ‘We-moli-bebegine, be Siria-dulemargi gwichiguoed, bela obelogedse be imakoed.’ ”

¹²Bela Bab-Dummad-gayaburba-barsogmalad weyob sunmaknanai gusmalad: “Ramot-De-Galaad-neggweburse be bila-ononae. Egi be obinoed, Bab-Jehová bemarga urmakoed.”

¹³Sorda-Micaíasʼse-gorapidi, Micaíasʼga weyob sogded: —Nue be itoge, igi Bab-Dummad-gayaburba-barsogmalad reyga sunmaknanai. Degisoggu, wemar-sogeyob be sogmogo, rey-nakoye be sogmogo.

¹⁴Micaías abin-sogded: —Bab-Jehová-Dula-Maid igi anga sunmakoe, ayobi an sogoed.

¹⁵Degidgine, Micaías reyse nonikid. Geb rey ega sogded: —Micaías, ¿Ramot-De-Galaad-neggweburse an bila-ononaed be an-itomoga? Micaías rey-abin sogded: —Be bila-ononae, be egi obinoed. Bab-Jehová bega we-neggwebur urmakoed.

¹⁶Rey abin-sogdebalid: —¿Ilabigwa an bese egisoe, anga Bab-Jehová-nuggi, nue-innikigwadgi be ibmar sogye?

¹⁷Agine, Micaías ega sogded: —Bela-Israel-dulemar igi sibad-wawaad e-idued-suliyobi, sapurganba aisakide an daksad. Bab-Jehová weyob soged: ‘We-dulemar e-dummadsuli gudimalad. Nuedgi na e-neg-e-negse namarsunno.’

¹⁸Israel-e-rey-Acab, Rey-Josafatʼga sogded: —¿Be daksa, igi an bega sogsa? We-Micaías ibmar-nued-anga-soged satedaed, unnila boniganse anga gotedaed.

¹⁹Micaías sogdebalid: —Bab-Jehová-gayaburba nue be itogo: Bab-Jehová e-ologangi-sii an daksad. E-baliwitur-bila-onomalad e-dikarba e-argan-nuedsik, degi, e-argan-sapiledsik bukwa nanaed.

²⁰Bab-Jehová weyob sogded: ‘¿Doa Acab-e-binsaed gaoe, Ramot-De-Galaadʼse bila-ononaega, adi, agi oburgwilegegar?’ ”Baliwitur-gwensak ibmar-sognai gusad, degi, baliwitur-baid ibmar-baid sognai gusmogad.

²¹Agine, burba-gwensak Bab-Jehová-asabin gwisgunonikid, ega sognonikid: ‘Ani an Acab-binsaed ganaoe.’ ”Bab-Jehová ega sogded: ‘¿Degite, igi be e-binsaed gaoe?’

²²”We-burba ega sogded: ‘An naoed, Bab-Dummad-gayaburba-barsogmaladse an naoed. A-dulemar gakansaega an imakoed.’ ”Bab-Jehová ega sogdebalid: ‘Degirdi, deyob be imaknado. Adi, deyob be e-binsaed gaoed.’

²³Agala, Bab-Jehová, e-gayaburba-barsogmalad-gakansaega burba-barmialid. Degisoggu, begi boni-dummagan bela yolenonisundo.”

²⁴Agine, Quenaana-machi-Sedequías, Micaías-e-wagar-ogochad, ega sogded: —¿Igi be soge, Bab-Jehová-E-Burba angi bar maisurye be sogde? Emisgindi, ¿Bab-Jehová-Burba bega sunmaksasunde?

²⁵Micaías abin-sogdemogad: —A-ibagine, be-sunnad be wisgunonikoed, geb be dukudii guoed.

²⁶Degidgine, Israel-e-rey-Acab sogded: —Negsemaid-Amónʼse be Micaías-nidmalo, degi, an-machi-Joásʼse nidmarbalo.

²⁷Ega be sogdapmalo: ‘Weyob rey sogye: Esgaryagi Micaías-simaloye. Unnila madu, diibogwa ega be ukmaloye. Bila-onogedgi an bonisuli aibirisar, geb be Micaías-onomaloye.’

²⁸Micaías abin-sogded: —Be nuedgi gannar aibirisale, soglegodo, ‘Bab-Jehová anga sunmaksasurye.’ Geb dulemar-bukwadga sogded: —Dulemar-bukwad, an-ibmar-sogsad be nue ebinsamalo.

²⁹Israel-e-rey-Acab, Judá-e-rey-Josafatʼbo Ramot-De-Galaadʼse bila-onogega nadmalad.

³⁰Geb Israel-e-rey-Acab Josafatʼga sogded: “An mer daklegega, mor-baid-yoi an bila-ononaoed. Bedina, reymor be yoed.” Agine, Israel-e-rey, mor-baid-yosa, bila-ononaded.

³¹Siria-e-reydina, e-dulagwen-gakambe-gakabo (32) ur-napaginedgi-bila-onomalad-e-dummaganga weyob sogsa gusad: “Mer dule-bamaladbo be bila-onomaloye, unnila Israel-e-reysebi be achamaloye.”