1Nipeꞌtirã Israe curuacjãrã masã marĩrõ, yucʉ marĩrõ, Sin wãmetiropʉ níꞌcãrã wijawãꞌcãcãrã niwã. Õꞌacʉ̃ cʉ̃ dutiꞌcaronojõta sajatiro waꞌameꞌrĩcãꞌcãrã niwã. Waꞌa, Refidim wãmetiropʉ tojaqueꞌacãrã niwã. Topʉre ne aco na sĩꞌrĩse marĩcaro niwʉ̃.
2Tojo weerã Moisére uase meꞌrã, “Ʉ̃sãrẽ aco sĩꞌrĩse oꞌoya”, nicãrã niwã. Moisé peꞌe “¿Deꞌro weerã yʉꞌʉre tojo ucũti? ¿Deꞌro weerã ‘¿Õꞌacʉ̃ ʉ̃sãrẽ aco oꞌomasĩweti?’, ni wãcũti?” ni yʉꞌticʉ niwĩ narẽ.
3Na masã peꞌe aco wʉoyʉꞌrʉarã, Moisére tojo ũrũsãcãrã niwã. Aꞌtiro nicãrã niwã: —¿Deꞌro weeacjʉ ʉ̃sã Egiptopʉ níꞌcãrãrẽ miiwijari? ¿Mʉꞌʉ ʉ̃sãrẽ, ʉ̃sã põꞌrãrẽ, ʉ̃sã yarã waꞌicʉrãrẽ acowʉose meꞌrã wẽjẽgʉ̃ti nígʉ̃, miiwijari?
4Moisé tere tʉꞌogʉ, Õꞌacʉ̃rẽ ʉpʉtʉ sẽrĩgʉ̃, aꞌtiro nicʉ niwĩ: —¿Yʉꞌʉ deꞌro weegʉsari ãꞌrã masã meꞌrã? Cãꞌrõacã dʉꞌsaꞌa na ʉ̃tãperi meꞌrã yʉꞌʉre doque wẽjẽatjo, nicʉ niwĩ.
5Tere tʉꞌogʉ, Õꞌacʉ̃ cʉ̃rẽ yʉꞌticʉ niwĩ: —Masã dʉporo yʉꞌrʉaya. Niꞌcãrẽrã wiorã Israe curuacjãrãrẽ sʉꞌori nirãrẽ mʉꞌʉrẽ baꞌpatidutigʉ pijiaya. Tojo nicã tuacjʉ, mʉꞌʉ dia Nilore paapoꞌoꞌcʉre miiwãꞌcãña.
6Yʉꞌʉ mʉꞌʉ dʉporo ʉ̃rʉ̃gʉ̃ Horeb wãmeticjʉ pʉꞌto ʉ̃tãgãpʉ nuꞌcũgʉ̃ti. Mʉꞌʉ tigare doteya. Mʉꞌʉ dotecã, masã sĩꞌrĩcã, aco wijarosaꞌa, nicʉ niwĩ Õꞌacʉ̃. Moisé Israe curuacjãrã wiorã ĩꞌorõpʉ Õꞌacʉ̃ weedutiꞌcaronojõta dotecʉ niwĩ.
7Cʉ̃ tojo weeꞌcaropʉ Israe curuacjãrã na Moisé meꞌrã aꞌpepũrĩca beꞌro niyucã, Meriba wãme õꞌocʉ niwĩ. Tojo nicã toreta Masah wãme õꞌocʉ niwĩ. Masã Õꞌacʉ̃rẽ “¿Diacjʉ̃ta Õꞌacʉ̃ marĩ meꞌrã niti o niwetine?” níca beꞌro niyucã, tojo wãme õꞌocʉ niwĩ.
8Surara amaleca masã wãmetiri curua Refidĩpʉ Israe curuacjãrã meꞌrã aꞌmewẽjẽrã aꞌticãrã niwã.
9Tojo weegʉ Moisé Josuére aꞌtiro nicʉ niwĩ: —Niꞌcãrẽrã ʉmʉarẽ beseya. Bese, amaleca masã meꞌrã aꞌmewẽjẽgʉ̃ waꞌaya. Yʉꞌʉ ñamiacãrẽ aꞌtigʉ ʉ̃rʉ̃gʉ̃ dʉposãrĩpʉ nigʉ̃ti. Topʉre tuacjʉ Õꞌacʉ̃ yʉꞌʉre miadutiꞌcʉ meꞌrã nuꞌcũgʉ̃ti, nicʉ niwĩ.
10Josué Moisé dutiꞌcaronojõta weecʉ niwĩ. Amaleca masã meꞌrã aꞌmewẽjẽgʉ̃ waꞌacʉ niwĩ. Cʉ̃ topʉ na ʉmʉa meꞌrã waꞌari cura Moisé, Aarṍ, apĩ Hur wãmetigʉ, Moisére weetamugʉ̃, tigʉ ʉ̃rʉ̃gʉ̃ buꞌipʉ mʉjãcãrã niwã.
11Moisé cʉ̃ omocãrĩ sĩomorõrĩ curare Israe curuacjãrã tutuayʉꞌrʉnʉꞌcãcãrã niwã. Cʉ̃ omocãrĩ dijocã peꞌema, amaleca masã peꞌe na meꞌrã aꞌmewẽjẽrã tutuayʉꞌrʉnʉꞌcãcãrã niwã.
12Moisé sĩomorõmigʉ̃ ñujũcã ĩꞌarã, niꞌcã ʉ̃tãgã mii, cʉ̃rẽ dujidutirã dʉpocãrã niwã. Tuꞌajanʉꞌcõ, Aarṍ, Hur cʉ̃ omocãrĩrẽ tuuñeꞌe nuꞌcũcãrã niwã. Niꞌcʉ̃ niꞌcã pãꞌrẽ, apĩ ape pãꞌrẽ peꞌe nuꞌcũcãrã niwã. Na tojo weeyucã, Moisé ye omocãrĩ ne ñujũticaro niwʉ̃. Téé mujĩpũ sãjãcãpʉ tigʉ tuacjʉ meꞌrã sĩomorõtʉocʉ niwĩ.
13Tojo weegʉ Josué surara amaleca masã meꞌrã aꞌmewẽjẽgʉ̃, cʉ̃ ya diꞌpjĩjo meꞌrã wẽjẽpeꞌocãꞌcʉ niwĩ.
14Beꞌro Õꞌacʉ̃ Moisére nicʉ niwĩ: —Aꞌtere acobojoticãꞌto nígʉ̃, niꞌcã tũrũpʉ ojaya. Josuére aꞌtiro niña: “Nipeꞌtirã amaleca masãrẽ peꞌocãꞌgʉ̃saꞌa. Tojo weerã ne niꞌcʉ̃ aꞌti ʉmʉcocjãrã narẽ wãcũsome.” Tere Josuére wereturiacʉ niwĩ.
15Moisé niꞌcãrõ Õꞌacʉ̃rẽ ẽjõpeorã, waꞌicʉrãrẽ ʉ̃jʉ̃amorõpeoatjore niꞌcã mesã ʉ̃tã meꞌrã seeneocũucʉ niwĩ. Tore aꞌtiro wãme õꞌocʉ niwĩ: “Yʉꞌʉ wiogʉ Õꞌacʉ̃ yʉꞌʉre wapataꞌacã weegʉ́ nimi.”
16Aꞌtiro ni ucũcʉ niwĩ: “Yʉꞌʉ wiogʉ Õꞌacʉ̃ weetamusere sẽrĩrã, omocãrĩ cʉ̃ tiropʉ sĩomorõnoꞌwʉ̃. Õꞌacʉ̃ amaleca masã meꞌrã aꞌmewẽjẽnuꞌcũcjʉ̃sami. Aꞌtocaterocjãrã meꞌrã téé beꞌrocjãrãpʉ quẽꞌrãrẽ tojota aꞌmewẽjẽ yapatinuꞌcũgʉ̃sami”, nicʉ niwĩ Moisé.
