Än Salomon Fos 31:1-28

¹Ikkei ekewe kapas än Lemuel ewe kingen Masa, inan a aiti ngeni:

²En nei ät mi achengicheng, en pälüen ai iotek, met üpwe eäni kapas ngonuk?

³Kosap fangala om pöchökül ngeni fefin, kosap pwal fangala om moni ngeni ekewe fefin mi afeiengaua ekewe king.

⁴En Lemuel, kopwe rongorong: Esap öchiti ekewe king pwe repwe ün wain, esap öchiti ekewe sounemenem pwe repwe moneiti sakau.

⁵Pun are ra ün, repwe manlükala mine a fen pwüngüla pwe allük o atokala än chokewe meinisin mi riaföü pwüng.

⁶Wain me sakau a fän iten chokewe mi feil ngeni mäla, fän iten chokewe mi nom lon riaföü watte.

⁷Repwe ün o manlükala ar wöüngau me ar riaföü.

⁸Kopwe kapas fän iten chokewe resap tongeni kapas fän püsin iter, pwal fän iten än chokewe mi mwelele pwüng.

⁹Kopwe kapas o eäni kapwüng fän pwüng, kopwe peni än ekewe chon wöüngau me chon mwelele pwüng.

¹⁰A men weires än eman epwe küna eman fefin mi lipwäköch! Neminewe a kon aüchea seni fau aüchea.

¹¹Pwülüan we a anomu an apilükülük won, esap fokun wor an wöüngau.

¹²Lon unusen ränin manauan neminewe a föri föför mi mürina ngeni pwülüan, nge esap ariaföüü.

¹³A achocho le angang ren pöün o föri mangaku seni ülöülen sip, pwal seni ewe irä itan fläks.

¹⁴A uwato mongö seni toau usun chök ekewe sip wän chon amömö ra föri.

¹⁵A pwätä ünmweerän o amolätä mongö fän iten chon leimwan, a pwal aanganga nöün kewe chon angang fefin.

¹⁶A küna eu mälämäl o möni. A fotuki eu tanipin wain ren mine a angei seni an angang.

¹⁷A achocho le angang, a pöchökül o föri sokopaten angang.

¹⁸A mefi pwe meinisin mine a föri a lomot. A föri an angang tori lepwin.

¹⁹A püsin föri an terech o türüni üfan.

²⁰A kichiöch ngeni ekewe chon wöüngau o lifang ngeni ekewe chon mwelele.

²¹Esap öürek fän iten chon leimwan, lupwen sno a püngütiu, pun ir meinisin ra üföüf üf mi malül.

²²A püsin föri an pilangket, a üföüf üf seni mangaku mi pwechepwech me parapar.

²³Pwülüan we a sil me ren aramasen ewe telinimw, i eman lein ekewe souakomwen ewe fanü.

²⁴Neminewe a tei üf seni mangaku mi pwechepwech, a pwal föri pelit o amömö ngeni ekewe chon amömö.

²⁵A pöchökül o iteföüla, esap niuokusiti ewe fansoun epwe feito.

²⁶A eäni kapasen tipachem, mine a aiti ngeni aramas a fis fän kirikiröch.

²⁷A tümwünüöchü angangen chon leimwan, esap mongö anan mongö fän chipwang.

²⁸Nöün kana ra pwärätä ar kilisou ngeni, pwal pwülüan a ingemwareiti,