Proverbs 31:1-28

¹Imi King Lemuel ko bala saki ko nuam kausam:

²“Ikiko, aga namar! Ni ani atagu ningi bilangerem; ni aninga guranek ko nunguning. Ni ninguru ikiko!

³Ni imet nungumik te nimi me saparko, imet uwuta mu king suen biya nunga maguwuman.

⁴“O Lemuel, ikiko! Yu aora nana mu king alo nunga munan mena; yu aora nana ko kaera mu supuling alo nunga munan mena.

⁵Mu awuk, nuna yu aora namon ale munan kaloman wore nungamili saparuk se kariimet kituwura alo nunga bita maguwumon bore ko.

⁶Yu aora mu, kariimet kuemonko negawasan agi, kariimet ikup bibiya nunga iramuram se anisan wore nunga mel.

⁷Namon ale nunga yaman se nunga ikup ko nungamili saparukko.

⁸“Arikaya kituwura se nongota nunumi sangarmonko me terong mu nunga sangaruko.

⁹Kituwura alo nunga bitua ko munan diram la ko, sokel karogo balu ale nunga sangaruko.”

¹⁰Imet ningo nunguningkiri ninguru ariga ale ta mu mel yawara nunguningkiri; imet uwuta mu diamond kiaram.

¹¹Se ko kuari ningo diram la ko iki lagoso, ale mel ningo bo ko me tukunangaso.

¹²Nu pempem kuari kote ningo la bita lagoso, ale memek bo kumik te me beteso.

¹³Nu kuting kiwol nuam, se sipsip mone se mel saki karogo giso ale guang mel se siru samer duap duap nungurso.

¹⁴Nu dal biya awar inang gi laga karogo taiso, iwita beteso.

¹⁵Nu tumong biyala barasoso ale ko kari, ko kuriang, se ko ura imet lilim nunga inang nungurso.

¹⁶Nu ali bilik ko iki guruguwa dia taso, ale ko manga nukum mu te waen ningam aguso.

¹⁷Nu imet sokel ago, se ko ura suen la sokel ago bita lagoso.

¹⁸Noko diara guruga ninguru ko sinar taso ale manga terong taso; ale tirom karogo la ura iluso.

¹⁹Noko kuting mayang te irukokko mu guyak.

²⁰Nu kariimet kituwura se mel ko tukunangawara mu nunga sangaru saposo.

²¹Marir birigira ko kam ningi mu nu me ikia moso, mu awuk, noko kawam digo ko kariimet guang nungumik te eremonko mu terong la.

²²Nu guang anira kuwim te irokko mu biriso; ale ko guang nagurokko mu yawarakala nunguningkiri.

²³Se ko kuari mu kariimet ko amilmilasan se nu wonong ko supuling bo bagoso.

²⁴Noko imet mu guang yamel se mayang nunulan te kaola ko mu nungurso ale diara kariimet nongorak diaso.

²⁵Noko bagara aolak mu ningo diram se sokel ago; ale tom taiwoso mu ko anapeya mu ko me ikia moso.

²⁶Nu ikia sinar ago munakoso, ale noko kuring te mu diram la kiti guruga ko den arataso.

²⁷Nu ko kawam digo lilim la ninguru bitarso, ale gagor munan me ikiso.

²⁸Se ko kuriang den ningo ningo kumik ko balsan; kuari betela beteso ale amilmil tuso.