Än Salomon Fos 28:5-21

⁵Aramas mi ngau resap weweiti pwüng, nge chokewe mi niuokusiti ewe Samol mi Lapalap ra unusen weweiti.

⁶Eman chon wöüngau mi wenechar a mürina seni eman chon wöümong mi manau rikirik.

⁷Eman mi aleasochisi ekewe allük i eman nau mi tipachem, nge eman mi chiechi ngeni chon mongömong a aitengaua saman.

⁸Eman mi awattela wöün ren an angei manauan me winnan, a ionifengeni wöün fän iten ätewe mi kirikiröch ngeni chon wöüngau.

⁹Are eman esap aleasochisi ekewe allük, Kot epwe oput an iotek.

¹⁰Eman mi emweningaua ekewe chon wenechar ngeni mine a ngau epwe turulong lon ewe pwang a püsin tuw, nge chokewe esap wor ar tipis repwe angei feiöch.

¹¹Eman aramas mi pisekisek a püsin ikeetä pwe a tipachem, nge eman chon wöüngau mi mirit a silei pwe ewe chon pisekisek esap iei usun.

¹²Lupwen ekewe chon pwüng ra nemenem, a lapalap än ekewe aramas pwapwa, nge lupwen ekewe aramasangau ra nemenem, aramas ra opola.

¹³Eman aramas mi aopala an tipis esap fefeitä lon manauan, nge eman mi pwärätä o likitala, Kot epwe ümöümöch ngeni.

¹⁴Feiöchün eman aramas mi niuokusiti ewe Samol mi Lapalap fansoun meinisin, nge ätewe mi ülöförea lelukan epwe tolong lon feiengau.

¹⁵Eman sounemenem mi ngau mi nemeni chon wöüngau a usun chök eman laion mi wörüwör, ika eman pear mi cheri liapan.

¹⁶Eman sounemenem mi ngau esap wor an mirit a ariaföüü aramas, nge ätewe mi oput an epwe angei winnan fän pwüngingau epwe manauatam.

¹⁷Eman aramas mi nimanauei eman, i epwe süsüfeil tori ränin an mäla. Esap wor eman epwe alisi.

¹⁸Eman mi wenechar esap tolong lon feiengau, nge eman mi manau rikirik epwe tolong lon feiengau.

¹⁹Eman mi angang won fanüan epwe wor chomong anan mongö, nge eman mi föri sokopaten angang mi lomotongau epwe watte an wöüngau.

²⁰Eman aramas mi allükülük epwe wor an feiöch mi somwola, nge eman mi amüttiri an epwe pisekisek epwe küna apwüng.

²¹Esap mürina ach sipwe lifilifil aramas, nge fän iten essät pilawa eman aramas a tongeni föri mine esepwüng.