Än Salomon Fos 25:16-20

¹⁶Are ka küna chönün chunen, kopwe chök ün ükükün mine a tufich ngonuk, pun are ka kon mötüla ren, kopwe musäsinawu.

¹⁷Kosap feila fän chomong lon imwen chon arum, pwe esap osukosuk reöm o oputok.

¹⁸Eman aramas mi eäni kapas chofana usun chon arun a usun chök efoch nifötüföt, ika efoch ketilas, ika efoch föün esefich mi ken.

¹⁹Ach apilükülükü eman aramas, esap allükülük lon fansoun osukosuk, a usun chök efoch ngi man ra eni, ika efoch peche mi ter.

²⁰Eman aramas mi köl ngeni eman mi weires letipan a usun chök eman mi angei seni üfan lon fansoun patapat, pwal usun eman mi uwalong salt lon eu kinas.