Än Salomon Fos 11:3-25

³Wenechar a emweni chokewe mi wenechar, nge chokewe resap allükülük ra feiengau ren ar tunorikirik.

⁴Än eman aramas wöümong esap alisi lon ewe ränin apwüng, nge pwüng a angasala eman seni mäla.

⁵Ekewe esap wor ar tipis ra fetal won efoch al mi sonosonöch pokiten ar pwüng, nge ekewe aramasangau ra feiengau ren püsin ar föför mi ngau.

⁶Chokewe mi wenechar ra küna ngas pokiten ar pwüng, nge chokewe resap allükülük ra tup ren püsin ar mochenia.

⁷Lupwen eman aramasangau a mäla, an apilükülüköch a pwal wesila, nge mine eman chon pwüngingau a witiwiti, esap fis.

⁸Eman chon pwüng a küna ngas seni osukosuk, nge eman aramasangau a chök tolong lon osukosuk.

⁹Eman chon pwüngingau a afeiengaua chon arun ren kapasen awan, nge ekewe chon pwüng ra ngasala ren ar silelap.

¹⁰Chon eu telinimw ra pwapwa, lupwen ekewe chon pwüng ra feiöch, nge lupwen ekewe aramasangau ra mäla, mi wor mweireiren pwapwa.

¹¹Lupwen ekewe chon wenechar ra afeiöchü eu telinimw, a fefeitä, nge ren än ekewe aramasangau kapas ewe telinimw a tala.

¹²Eman mi tiparoch a aitengaua chon arun, nge eman mi mirit a fanafanala.

¹³Eman mi kukuloufeil o luapas a apworausa mine a monomon, nge ätewe mi allükülük a amonomona.

¹⁴Eu mwü epwe tala ika esap wor souemwen lon, nge anaie a wor ie chomong chon öüröür, a wor kinamwe.

¹⁵Eman mi pwon pwe epwe mönätiu än eman chon ekis liwinimang epwe fokun osupwang, nge ätewe mi oput ei sokun föför a feiöch.

¹⁶Eman fefin mi eäni kirikiröch aramas ra meniniti, nge ekewe mwän mi pwora ra chök pisekisekila.

¹⁷Eman mwän mi eäni kirikiröch a püsin feiöch ren, nge eman mi ariaföüü aramas a püsin feiengau ren.

¹⁸Eman aramasangau a angei winnen an angang nge esor iammürin, nge eman mi föri föför mi pwüng epwe angei liwinin mi nonomola.

¹⁹Eman mi chök föföri föför mi pwüng epwe manau, nge ätewe mi chök föri mine a ngau epwe mäla.

²⁰Ewe Samol mi Lapalap a oput aramas mi rikirik leluker, nge a pwapwa ren chokewe mi föri mine a pwüng.

²¹A fokun let pwe eman aramasangau epwe wesewesen angei liwinin an föföringau, nge chokewe mi föri mine a pwüng repwe küna ngas.

²²Eman fefin mi liöch, nge esap mirit, a usun chök efoch ring seni kolt lon pwötün eman piik.

²³Än ekewe chon pwüng mochen a sopolong lon mine a mürina, nge mine ekewe aramasangau ra apilükülüküni a sopolong lon kapwüng.

²⁴Mi wor aramas ra fangafangöch, nge ra chök pisekisekila. Mi pwal wor aramas ra fangangau, nge ra chök wöüngauala.

²⁵Eman aramas mi kichiöch epwe pisekisekila, nge eman mi alisi aramas, aramas repwe pwal alisi.