Tɛnɛ Faalaaliiti 11:3-25

³Ladalai ɠa loni sɔle nuiti tuɠɔ, kɛlɛ yaava nuiti ta-woyai ɠa ɗa lati, é ti ɠoloɠolo.

⁴Naavoloi la levea ga ani nɔpɛ, tukpɔɠaaleʋe voloi, kɛni telebodai ɠɛɛ vai nɔ ɠa a nu ɠizo saai ma.

⁵Telebo nui ná-ladalai ɠa ɗa ná-eteai zɔle, kɛlɛ faa ɲɔu ɠɛ nui ɓɔɠɔ vaa ɲɔi ɠa a ɗa too.

⁶Telebo nui ná-sɔlegi ɠa ɗa kizo faaɓaagiti ma, kɛlɛ woovele nuiti koozu ɠisiɛi ɠa ɗa ɠɛ ga balii, ti ɠɔɔ la.

⁷Siɛgi zu nu ɲɔi zaazu la, ná-kitogi pɛ ge ɠoloɠologa, ná-kitogi é ɠɛni ga naavoloi, naa loa ya.

⁸Telebo nui ɠa ɠula kidaaʋiligi zu, faa ɲɔu ɠɛ nui ʋilɛ potogi zu.

⁹Nui é ɠɛlɛzu GALA ba, naa ɠa ɗa zɔiti koloɠolo ga daawooiti, kɛlɛ telebo nuiti ɠimalai ʋɔ, ta ɠizo.

¹⁰Siɛgi zu telebo nuiti undaanɛɛzu la, taai kpein koozu ɠa ɗa nɛ, siɛgi zu faa ɲɔu ɠɛ nuiti undaaʋilisu da, nuiti ta ɗa wooɠula ga koozunɛɛi.

¹¹Sɔle nuiti daa luyai ɠa ɗa ʋa ga ɓɔɠɔzɔlɔɔgi ta-laazuʋɛ. Kɛlɛ faa ɲɔu ɠɛ nuiti daa ɓɔɛi ɠa ɗa koloɠolo.

¹²Zɔi é seiɲɔɠɔi ʋɛlɛʋilisu, naa la ga faaɠaaɠaa nu, kɛlɛ nui nii é faa ɠaaɠaazu, naa ɠa ɗa maaɠɛ kpɔ.

¹³Fama wo nui ɠa ɗa dɔɔɠuzu vaiti kula kɛlɛma, kɛlɛ sɔɓelama nui ɠa ɗa ti makɛ ɠoozu.

¹⁴Siɛgi zu totuɠɔ ʋagɔ la zooi ʋɛ la, nuɓusɛiti ta ɗa loo bu, kɛlɛ kizogi ɠa ɗa zɔlɔɔ tɛnɛ bo nu mɔinmɔingiti zea.

¹⁵Zɔi é yeelaazu wɛɛn maaɠuyei ɠa, toɠa ɓaa ma, kɛlɛ zɔi é ɠɛlɛzu zeelaga vai ʋa, naa ɠa ɠɛ ziilɛigi zu.

¹⁶Anzanu ʋagɔi ɠa ɗa lɛbiyai zɔlɔɔ, suɓa zunuiti ti naavoloi zɔlɔɔ.

¹⁷Zunui é nuɓɔɠɔlai ɠɛɛzu, naa ɠa kɛɛzu ɓɔɠɔ nɔ ʋɛ, kɛlɛ suɲɔu zunui ɠa ɓɔɠɔ maanɔɠɔzu.

¹⁸Faa ɲɔu ɠɛ nui ɠa ɗa yaava lɔnɔgi ɠaiziɛ, kɛlɛ zɔi é telebodai ɠɛɛzu, naa ɠa ɗa zala ɠitei zɔlɔɔ.

¹⁹Zekana, telebodai ɠaaɓelazuʋɛ ɠa ga zɛnvui, kɛlɛ zɔi é ʋilɛsu faa ɲɔi ʋolu, naa ɠa saai laaɠomisu.

²⁰Ɠɔoɠɔ GALAGI la wɔinni ga naati, niiti ti-yiimaʋɛ laavegai ga yaavai, kɛlɛ toɠa losu naati polu, niiti ti ziɛzu ga sɔledai.

²¹Gaamazu, faa ɲɔu ɠɛ nuiti salalalai la yɛga, kɛlɛ telebo nuiti ti-mavofodaiti ta ɠizo.

²²Anzanui nii pagai, kɛlɛ balagai ɠigi ma, kɛɛʋɛ eɠɛ zanu balaɠaegi piligai boigi zokpai ʋa.

²³Telebo nuiti wɔinma vaa ɠila kpegi nɔ ɠa faa ʋagɔi. Nii nɔ faa ɲɔu ɠɛ nuiti ta zoo ti ɠito ba, naa ɠa nɔ ga GALA ná-ziiɠaawanai.

²⁴Tanigaa ta ɗa faanɛɛi ɠɛ gola, tama ti ɗa wola ɓɛtɛ. Tanigaa ma ti ɗa ɠikpa naavoloi ma gola, tama ti ɗa ʋala.

²⁵Faanɛɛ ɠɛ nui ɠa ɗa sɔlɔɔgi wo gola, zɔi a nu ɠɔ ga kpɔɔleɗɛi, tɔ ɓalaa ka kpɔɔleɗɛi zɔlɔɔ.