Zinama Tumatumae 4:4-25

⁴si va tumatumae au sa meke zama, “Mu tuqe va nabu i sari qua zinama pa doduruna sa bulomu; kopu ni sapu tozi nigo rau pude mu toa.

⁵Vagia sa ginilagilana lohina pude balabala valeana; mu lopu muliṉi ni sari qua zinama babe kilui.

⁶Mu lopu veko pania sa ginilagilana lohina, na kote lavelave nigo sa, tataru nia meke kote kopu nigo sa.

⁷Sa ginilagilana lohina si arilaena hola ni sari doduru, ke mu vagia sa ginilagilana lohina. Be sage hola hinoluna sa ba holu vagia.

⁸Tataru nia, meke kaqu ovulu igo sa; hapahapa nia, meke kote va lavata igo sa.

⁹Kote ta tatarue koe Tamasa si goi, guana va sage nigo havoro sa pude va leleana ia sa batumu; meke ponigo na toropae tolavaena sa si agoi.”

¹⁰Tuqu, avoso mae koa rau, va tabei sapu zama ni rau, meke sari vuaheni pa mua tinoa si kote sokudi.

¹¹Maqu tozi nigo sa siraṉa tanisa ginilagilana lohina, meke turaṉigo koasa siraṉa toṉotona.

¹²Pana ene goi, si lopu kaqu soqo sari nenemu; totoso haqala goi si lopu kaqu ta tubarae si agoi.

¹³Tuqe va nabua sa tinarae, lopu luara pania; kopu nia, na asa mo sa mua tinoa.

¹⁴Lopu neti la vasina hoke ene gua sari tie kaleadi babe ene luli koa rini.

¹⁵Veko pania, lopu ene hokara la ia; mu taliri va seu koasa, mamu ene taloa mua.

¹⁶Ura lopu kaqu puta si isara laelae pu kaiqa tinavete kaleadi si taveti rini; lopu boka magogoso osolae kaiqa tie si va hoqai rini.

¹⁷Na kinaleana sa gedi ginani meke na vinaripera variva mate si na dia napo vaeni.

¹⁸Sa siraṉa tadi tie toṉoto si guana kalalasa pana vaqavaqasa, sapu bakala hitehite vura osolae kamo sa rane.

¹⁹Sa siraṉa tadi tie kaleadi si huporo dudukurumu; lopu gilania rini sa si ta tubarae nia rini.

²⁰Tuqu, va avosi sapu zama ni rau, va avoso va leana koari na qua zinama.

²¹Mu lopu va rizui pa matamu, kopu ni pa korapa bulomu.

²²Ura na tinoa si arini koari tie pu va bakali, meke na minagogoso pa tini tie.

²³Lavelave nia sa bulomu; ura vasina bukaha vura sa mua tinoa.

²⁴Veko pani sari zinama sapu lopu hinokara, va seu i sari zinama sinekesekeidi.

²⁵Sari matamu si madi doṉo toṉoto la pa kekenu, mu doṉo la vasina pu korapa ene la ia goi.