Zinama Tumatumae 31:6-31

⁶Poni bia sarini pu korapa tata mate, na vaeni koarini pu kuliusu;

⁷Madi napo pude muliṉi ni rini sari dia hinabahuala meke lopu balabala i sari dia tinasigiti.

⁸Zama poni sari habahuala pu lopu boka zama puleni, zama ni sari tinoṉoto tadi kasa pu loke dia poata.

⁹Zama vura, mamu lopu va kalekale pa vinaripitui; toketoke nia sa tinoṉoto tadi pu malaṉa meke saripu loke gedi.

¹⁰Esei boka dogoria sa barikaleqe sapu gotogoto nana hahanana? Na arilaena si asa, holani sari na patu ṉedala.

¹¹Sa nana palabatu si raṉe hola ia si asa meke loketoṉa si papaka nia sa.

¹²Na lineana si va kamo lani sa barikaleqe koasa, loke tina sigiti, pa doduruna sa nana tinoa.

¹³Sa barikaleqe si vizata vulu meke lineni meke tupiti sari lima ṉaliṉalidi tanisa.

¹⁴Guana vaka sapu la holuholu si asa, meke pa seu suraṉa pule mae ginani.

¹⁵Tekulu si asa sipu korapa huporo; meke tavete ginani si asa tadi nana tatamana meke hia tinavete si asa koari nana nabulu vineki.

¹⁶La vilitia sa si keke pepeso meke holua sa; koari poata va gavori sa si letea sa sa inuma vaeni.

¹⁷Na barikaleqe tavetavetena hola si asa; sari limana si ṉiṉira gua tugo sari nana hiniva.

¹⁸Dogoria sa sapu va vura poata sari nana hinoluholu, meke sa nana zuke si lopu hoke mate pana boṉi.

¹⁹Pa limana soti si tavete vura lozi si asa, meke koari kakarutuna si tigisi vura nia sa sa poko.

²⁰Tukeli sa sari limana koari pu malaṉa, meke huhuki sa saripu loke gedi.

²¹Totoso kamo sa ibu, si lopu talotaṉa ni sa sari nana tatamana; ura doduru si ele va sage poko arilaedi tu.

²²Taveti sa sari poko ivara tana nana teqe; meke asa si va sage poko lineni meke pepolo.

²³Sa nana palabatu si ta pamaṉaena pa vasina varivarigarana koasa vasileana; hoke la habotu si asa pa varikorapadi rina palabatu koasa popoa.

²⁴Tavete poko lineni sa barikaleqe bokabokana meke holuholu ni sa, na belete si la holuholu ni sa pa sitoa.

²⁵Na ṉiniraṉira meke pinamaṉa si pokopoko ni sa; boka hegere ni sa sari na rane pa kenuna.

²⁶Zama si asa pa ginilagilana lohina, meke na vina tumatumae si hoke tozi sa pa meana.

²⁷Doduru ginugua pa nana kinoa tatamana si kopu ni sa meke lopu hoke hakohako si asa.

²⁸Tekulu sari nana koburu meke poza nia, “Tamanaena,” rini; sa nana palabatu ba va lavatia tugo:

²⁹“Soku barikaleqe si taveti tugo sari ginugua sapu arilaedi, ba hola beto ni agoi.”

³⁰Dinoṉo lea si kokoha meke tinolava si tuturei hola taloa; ba sa barikaleqe sapu pamaṉa nia se Zihova si kote ta vahesi.

³¹Pia ia si asa koari doduru pu taveti sa. Sari nana tinavete va lavatia si asa koari na tie.