Sua Tutŋana 31:6-31

⁶Yok mbolŋana mi baen, ina king koroŋ kizin som. Ina koroŋ kizin wal ta tikamam be timeete i, mi zin wal ta lelen ipata kat ma timbotmbot.

⁷Pa zin wal ta len koroŋ som ma timbot ŋoobo, mi zin wal ta lelen ipata kat na, tiwinin bekena matan mbeleele pataŋana kizin.

⁸Zin wal ta tirao be tiporoukaala zitun som na, sombe tomtom tikam ŋoobo zin, na nu maane pepe. Maŋga mi so sua bekena uulu zin. Zin wal ta timbotmbot raama pataŋana na, mender pizin mi urpe pataŋana kizin ma indeeŋe men.

⁹Tana sombe tomtom timbotmbot raama pataŋana mi tiru zalan na, nu maane pepe. Maŋga mi so sua bekena uulu zin. Mender pizin, mi urpe pataŋana kizin ma indeeŋe men.

¹⁰Sombe tomooto sa leleene be iwoolo, mi indeeŋe moori ŋonoono ta ikamam kat mbulu, na ni ikam le koroŋ ambaiŋana kat. Zin moori ta kembei tilip pa pat milmilŋan ta kan kadon bibip i. Tamen zin boozo som. Ko tendeeŋe zin la ki parei?

¹¹Moori ta kembei na, kusiini ko irao ipase pini kat. Mi ni ko iuulu kusiini be ikam koroŋ ndabokbokŋan boozo.

¹²Mazwaana ta imbotmbot su toono, na ikamam mbulu ambaiŋana men pa kusiini. Irao ikam mbulu sananŋana sa pini na som.

¹³Ni moori nama mosŋana. Irao iurpe sipsip rumuunu mi koroŋ pakan ma iwe mburu be tomtom tizeebe zin pa. Mi ni mata seŋana, mi ikamam uraata raama menmeeni.

¹⁴Ni kembei wooŋgo ta ilala lele molo mi ikamam koroŋ popoŋan ma timar. Pa ilala irru kini matakiŋa bekena ikam pa wal kini.

¹⁵Mbeŋbeŋŋana mi ni imaŋgaŋga be iteege you pa wal kini, mi iurur zin mbesooŋo moori kini pa uraata.

¹⁶Ni irru toono ambaimbaiŋan be iŋgiimi ma iwe lene. Mi iŋgiimi toono tana pa pat ta ikamam pa uraata kini na, mi ipaaza ke baen isula.

¹⁷Ni maolŋana som. Ni moori uraataŋana.

¹⁸Mburooŋo ta ni ikamam na, isipirpir som. Ire kembei iurur ŋonoono. Mi lam kini na, imetmeete som. Pa ni ikamam uraata pa mbeŋ tomini.

¹⁹Ni iurpewe koroŋ pakan be isese ma iwe mburu.

²⁰Mi iwelweele namaana mi irairai koroŋ pakan pizin wal sorrokŋan. Mi zin wal ta timbotmbot raama pataŋana na tomini, ni iuluulu zin.

²¹Sombe lele isaana, na ni irao ikam ŋgar boozo pa na som. Pa iparaŋraŋ wal kini len mburu pataaŋa kek. Wal kini tizebzeebe zin pa mburu ambaimbaiŋan men.

²²Tana irao nin tekteege pa mbeŋ som. Pa ni iurpewe len mburu be tikototo zin pa. Mi ni itunu na, izebzeebi pa mburu ndabokbokŋan ta kan mos ambaimbaiŋan na.

²³Tomooto ta so iwoolo moori ta kembei, isombe ila ma ziŋan zin kolman tilup zin pa sua, nako tomtom len ŋger pini, mi tire i kembei tomtom ŋonoono.

²⁴Moori ta kembei, ni isese mburu ambaimbaiŋan mi ikamam ŋgomo pa. Mi iurpewe pus bekena tomtom tiŋgiimi mi tila tikam ŋgomo pa.

²⁵Mbulu kini ŋgeezeŋana ta iwe aigau pini, mi ikam ma tomtom tipakuri ma tiso ni moori ŋonoono. Mi mbulu tabe ipet pa kaimer i, na ni imototo som. Pa mbulu pareiŋana ta so ipet, na ni ko imender mbolŋana.

²⁶Ni izzo sua raama ŋgar. Mi ipaute wal kini be tiurur kat lelen pa Anutu mi zin tomtom.

²⁷Ni imborro kat ruumu kini. Irao imbomboorene mi ikam mbulu kembei ta wal maolŋan na som. Ikamam kat uraata.

²⁸Moori ŋonoono ta kembei na, lutuunu bizin ko lelen ambai pini mi tipakurkuri. Mi kusiini tomini ko iwidit uruunu ma iso ta kembei:

²⁹“Moori boozomen tirao pa mbulu. Mi nu na, lip kat pizin.”

³⁰Tana moori ruŋgun, som mbulu kizin pakan ta ikamam zin tomooto lelen, na takam ŋgar pa pepe. Pa ina koroŋ ŋonoono som. Imbot rimen mi imap. Mi moori ta so imototo Yooba mi ileŋleŋ la kalŋaana, to tapakuri.

³¹Pa ni ikamam kat mbulu. Tana iti tapakuri pa uraata ta ni ikamam na, mi tiwit uruunu ila iwal biibi matan, to indeeŋe.