Zinama Tumatumae 25:1-23

¹Hire pule sari kaiqa zinama tumatumae te Solomone, ta kubere vagi koari na tie te Hezikaea sa baṉara pa Ziuda:

²Na vina lavata te Tamasa si pude va paere i si kaiqa ginugua; ba pude hata vura ni sari ginugua si na vina lavata tadi na baṉara.

³Gua sapu ululu gua sa maṉauru meke lohi sa lamana, sari bulodia rina baṉara si lopu boka ta hata vura.

⁴Via pani pakia sapu rida koasa siliva, pude vura sapu boka tavete vura nia tiṉitoṉa tolavaena;

⁵gua tugo sa tie totoli kaleana koasa baṉara si va rizu taloa ia sa, pude sa hinabotu baṉara tanisa si kote nabu meke toṉoto.

⁶Mu lopu va ululu pule nigo si goi pa kenuna sa baṉara, lopu zukuru pule la nigo koari na tie nomadi.

⁷Leana hola si pude zama igo sa, “Sage mae tani,” hola nia sapu pude ta gegese pa kenudia rina palabatu.

⁸Sapu dogoro nia agoi pa matamu si lopu tuturei paleke la nia pa vetu varipitui, ura sa si kote boka tavetia goi pa vina betona be va sosodea sa turaṉamu sapu sea si goi, meke va kurekure igo?

⁹Be tokea goi sa turaṉamu pa keke ginugua, si lopu va vura ia si keketoṉa ta tomena tana votiki tie,

¹⁰ba be kote avoso nia sa tie meke kote va kurekure igo, meke sa pozapoza kaleana tamugoi si kote koa hola.

¹¹Na zinama pa totoso gotona si tolava guana vinasari qolo pa peleta siliva.

¹²Guana vikuvikulu qolo babe na pakupaku qolo sa ginegese tanisa tie gilae la koasa taliṉa sapu okoro va avoso.

¹³Guana ibuna sa tototolo totoso pakepakete si sa tie ta ronuna sapu paleke inavoso, koa rini pu garununa.

¹⁴Guana givusu meke lei loke rukuna, si sa tie sapu vevehe nia sa vinariponi sapu lopu vala nia sa.

¹⁵Pana hitehite agoi si kote boka va hinokara igo mo sa baṉara, na zinama va mamamana si boka va moku susuri.

¹⁶Pana dogoro zipale goi, si hena vasinahite mo, lopu hena va hola, na kote lua mo si goi.

¹⁷Kaiqa totoso mo mamu neti pa vetu tanisa turaṉamu pana soku totoso, si kote hakohako nigo mo sa.

¹⁸Guana vedara, na magu, babe na tupi ṉaruna sa tie sapu va sosode kokoha la koasa turaṉana.

¹⁹Guana sigiti livo babe na nene ikena sa kinalavarae la koasa tie lopu ta ronuna pa totoso tasuna.

²⁰Guana ta vagi palae sa nobi totoso ibu, babe na sile ta veko la pa bakora, sa tie pu kera qetuqetu la koasa pu korapa talotaṉa.

²¹Pana ovia sa mua kana, si mu ponia ginani; be memeha si asa, si mu ponia kolo pude napo.

²²Pana gua asa goi, si kote va kurekure ia goi si asa, meke kote pia igo e Zihova si agoi.

²³Gua sa givusu togarauru sapu paleke mae ruku, si gua tugo sa mea nanaena sapu va gevuru binugoro.