Zinama Tumatumae 13:5-23

⁵Sa tie toṉoto kana hola ia sa kokoha; ba sa tie kaleana si taveti sapu variva kurekure hola.

⁶Na tinoṉoto lavelave nia sa tie sapu loke nana tinazutu, ba na kinaleana si na hinoqa tadi na tie seadi.

⁷Keke tie si va gulegulea sapu tagotagona gua, ba si loketoṉa tu tagoa; keke pule si habahualana gua, ba si tagotagona tu.

⁸Na tie tagotagona si boka tabaria sa kana pude harupu pule nia, ba sa tie malaṉa si loke tie okoro hiva ṉovalia.

⁹Sa zuke tanisa tie toṉoto si kalalasa va leana hola, ba tanisa tie kaleana si lamo pa mate.

¹⁰Na vinahesi pule si va gavogavoro vinari tokei, ba sa ginilagilana lohina si ta dogoro koarini pu vagi vina balau.

¹¹Poata sapu tuturei ta vagi, si lopu sana murimuri palae tugo, ba asa pu va naqiti tatasa poata si va toqoli sa.

¹²Pude seunae aqa nia si keketoṉa leanana si hoke lehu sa tie, ba pana gorevura gua sapu ta hivae si na qinetuqetu lavata.

¹³Asa pu lopu va ari laena ia sa tinarae si vata tasuna pule nia, ba asa pu pamaṉa nia sa ginarunu si kote ta pia.

¹⁴Sa vina tumatumae tanisa tie gilagilana si na bukaha pa tinoa, va kekeria sa sa tie koasa sipata tanisa minate.

¹⁵Na ginilagilana sapu bakala si ta pamaṉae, ba sa tie sekesekei si ene la pa tinasuna.

¹⁶Sari tie gilaedi si balabala paki meke tiqe tavetavete, ba sa tie duvili si va dogoro nia sa nana pinupuhu.

¹⁷Pana paleke inavoso sa tie kaleana si na tinasuna si kote vura, ba sa tie ta ronuna si kote turaṉa sinalaṉa.

¹⁸Asa pu lopu luli tinarae si kote kamoa na minalaṉa meke kinurekure, ba asa pu va taliṉa ia sa ginegese si kote ta pamaṉae.

¹⁹Sa hiniva sapu gorevura si lomoso pa maqomaqo, ba sa tie duvili si korona kekere koari na hahanana kaleadi.

²⁰Asa pu ene turaṉi saripu gilagilana si kote gilagilana tugo, ba asa pu baeri sari na tie duvili si ṉovala pule nia.

²¹Na tinasuna luli i sarini pu tavete va sea, ba kinoa va leana si na pinia tadi pu toṉoto.

²²Na tie leana si veko hola tinago tadi nana koburu pu podoi na tuna, ba sari tinagotago tadi na tie kaleadi si dia ri na tie toṉoto.

²³Na inuma tanisa tie habahuala si kote boka namu va leana, ba sari hahanana kaleadi tadi na tie kaleadi si kote sara pani.