Tɛnɛ Faalaaliiti 13:5-23

⁵Telebo nui ɠa ɗa zɛɛ ɓɔɛiti wɔinzeɠe, kɛlɛ nu ɲɔi ɠa ɗa unfe fai ɠɛ, ta tɔɠɔ ɠoloɠolo fai.

⁶Zɔi é siɛ ʋelei zɔlegai, telebodai ɠa ɗa naa makɛ, kɛlɛ faa ɲɔi kotoba nuiti ti kɛɛzu, naa ɠa a ɗa ti undaaʋili.

⁷Tanigaa ta kɛɛzu eɠɛ ta ɓɛtɛ, tama ani nɔpɛ ge la ti ya, tanigaa ti ɓɔɠɔ ɠɛ eɠɛ bala nu, kɛlɛ anii ti ya ga gola.

⁸Tanisu naavolo nui ɠa ɗa ani zala, é ʋa zɛnvui unmɔɔ, kɛlɛ bala nu la woiloga zeliloma ma.

⁹Telebo nui ɠa volozu, eɠɛ wozakalagi gola volozu, kɛlɛ faa ɲɔu ɠɛ nui ɠɛɛʋɛ eɠɛ lanboi, nii é zaazu.

¹⁰Sakpegi kpein ka ɠulazu wasogi zu, ɠimalai ɠa naati zea, niiti ti woilosu tɛnɛgiti ma.

¹¹Naavoloi nii sɔlɔɔgai ga wuugi, gaa ɠa ɗa ʋala ba, kɛlɛ nii sɔlɔɔgai vaa, vaa, naa ɠaa ɠa ɗa wɔɔlɔ.

¹²Nui ná-kitogi a ɠoloɠolona, toɠa ɗa ziiɓɔlɔ, kɛlɛ nui yiima vai a ɠɛɛna, naa ɠɛɛʋɛ eɠɛ zɛnvu wului.

¹³Zɔi a wooi ʋɛlɛʋilina, naa ɠa suɓoloɠɔmɔ, kɛlɛ zɔi a devei zona, naa ɠa ma zalai zɔlɔɔ.

¹⁴Ɠima nui ná-kalagi ɠa ga zɛnvu ɗɛungi, toɠa ɗa kaka faiti kpudɛ nu maazu, niiti ta ɠɛ ga nu zaa vaa.

¹⁵Kɛʋele ʋagɔi ɠa ɗa zaalai la nu ma, kɛlɛ gaaɓelazu la yaava nuiti ta-ʋelei ʋa.

¹⁶Ɠima nu la faa ɠɛa, ni é la ɠigaiziɛni su, kɛlɛ ɠimalala nuiti ta ɗa ta-ɠimalala vaiti sulɛ.

¹⁷Keelai ɲɔuɗai, naa ɠa ɗa lɔ maanɔɠɔi zu, kɛlɛ gooleʋe nui sɔlegai, naa ɠa ɗa faiti suɓɛtɛ.

¹⁸Baladai ta unfegi ɠa naama nui luɠɔ, nii é ɠɛlɛzu maaɠoloi ʋa, kɛlɛ zɔi a va tɛnɛ gooiti bu, naa ɠa lɛbiyai zɔlɔɔ.

¹⁹Toɠa ga faa ʋagɔ nui wɔinma vai laazeeli, kɛlɛ ɠimalala nuiti ti la wɔinni ga ti yeeɠula faa ɲɔi zu.

²⁰Nui é ziɛzu ɠima nuiti polu, toɠa ɗa ɠɛ ga ɠima nu, kɛlɛ zɔi é zeizeisu ɠimalala nuiti koba, naa ɠa faaɓaagi zɔlɔɔ.

²¹Maanɔɠɔi ɠa kotoba nuiti polu, undaanɛɛi ɠa ɗa telebo nui zala.

²²Zunu ʋagɔi ɠa ɗa poganii yɛ ná mavofodaiti bɛ, kɛlɛ kotoba nui ná-sɔlɔɔgiti makɛgɛ ga telebo nuiti tɔnɔ.

²³Bala nui ná-woza wogai zu ɠa a ɗa ɠɔnɔgi zɔlɔɔ ná, ga bɔɔlɔa, kɛlɛ telebotalai ɠa ɗa ɠɔnɔgi ɠoloɠolo.