Yuhanis 4:1-12

¹Etan kit sukat Yuhanis nol Yesus sam, Yesus ima-ii las sarain nal atuli mamo dui. Yesus esa sarain atuil lo, mo in sarain atuli ka Un ima-ii las. Nikit Yesus taan son noan, atuil deng partei agama Farisi la ming le oen sarain nal atuli mamo dui,

³kon Un nol Un ima-ii las le lakos nang dale Yudea, halin pait propinsi Galileas.

⁴Mo oen musti laok muid propinsi Samarias muna le, halas-sam oen bisa lakos lius propinsi Galileas.

⁵Oen lakos lius kota mes se propinsi Samaria, ngala Sikar. Maan na dadani nol dale man upung Yakob in bel un ana Yusuf fa.

⁶Se na, muik ui in kali mesa, ngala ‘ui Yakob’. Lelo ditu kon Yesus nol Un ima-ii las lakos lius se las. Un nataka kam kae, tiata Un daad le tene se ui in kali na. Kon Un ima-ii las nang Un sii se la, mo oen taam lakos sos in kaa se kota la. Kon bihata mes deng kota la maa le naus ui se ui in kali na. Yesus nodan un noan, “Bata. Auk nodan ku ui in ninu bubuit le.”

⁹Mo bihatang na nahkitu, lole taom atuil Yahudi las nakbuan nol atuil Samaria las lo. Tiata un keket bali Yesus noan, “Hoe! Paap niam atuil Yahudi. Mo auk niam atuil Samaria. Lam tasao le Paap nodan ui in ninu se au lia?”

¹⁰Yesus tekan noan, “Eta bata taan asa man Ama Lamtua Allah in le bel totoang atuli lia ka, nol taan noan in nodan ui le ninu ni asii lam, taon elola ko bata nodan bali ui deng Au. Le Auk bel ui man kil in nuli ka.”

¹¹Bihatang na tek noan, “Papa, sapat in kait ase. Hidim ui in kali ni bolo ki blatas isi. Paap haup ui in nuli na deng ola la?

¹²Taon elola le Paap uhu dui deng kit upun Yakob pa? Un man nang bel kaim ui in kali nia. Nol un esa kon niun deng ui in kali nia. Un anan nas nol un aus-sapi las kon niun deng ui nia.”