Yaburina 139:6-22

⁶Na fe kolonna magaxu n tan yɛɛ ra yi. A dangu n na, n mi nɔɛ a yigbɛ mumɛ!

⁷N nɔɛ sigɛ minɛn, n yi n luxun i ya Nii Sariɲanxin ma? N sigan minɛn yi, n keli i tan yɛtagi?

⁸Xa n te ariyanna yi, i na yi. N na siga laxira yi, i na yi.

⁹Hali n siga han sogetedeni, hanma n sa dɔxɔ fɔxɔ igen xanbi ra,

¹⁰i tima nɛn n yɛɛ ra mɛnna fan yi, i mi n nabeɲinɲɛ mumɛ!

¹¹Xa n na a fala, n naxa, “N xa n luxun dimini. Kɛnɛnna xa findi kɔɛɛn na n nabilinni.”

¹²Koni sese mi dimin na i tan yɛɛ ra yi, kɔɛni yalan alo yanyina i tan yɛɛ ra yi. Dimin nun yanyin birin lan i tan xa.

¹³I tan nan n sɔndɔmɛn daxi, i tan nan n saxi nga fatini.

¹⁴Ala, n ni i tantunma, amasɔtɔ n da kiin magaxu, i kɛwanle magaxu. N na a kolon n niini ki faɲi.

¹⁵N fati bɛndɛn mi yi luxunxi i tan ma, i to yi n nafalama suturani i yi n dama nga kui waxatin naxan yi.

¹⁶I yi n toma benun n fatin xa yelin nafalɛ. I bata yi n ma siimayaan xasabin sɛbɛ i ya kitabun kui, benun a xa fɔlɔ waxatin naxan yi.

¹⁷Ala, i ya miriyane famu raxɔlɔ n xɔn. E xasabin wuya!

¹⁸Xa n na e yatɛ, e wuya mɛɲɛnsinna xa. N na xulun waxatin naxan yi, n mɔn luma i tan nan fɛma.

¹⁹Ala, a yi lan nun i xa muxu ɲaxine faxa! Faxa tiine, ɛ masiga n na.

²⁰E fala ɲaxine tima, e i xili kala. I yɛngɛfane i xinla falama fuun nin.

²¹Alatala, n mi muxune raɲaxuɛ ba naxanye i raɲaxuma? N bata n mɛ na muxune ra naxanye murutɛxi i xili ma.

²²E mi rafan n ma mumɛ! N bata e yatɛ yaxune ra.