Salmo 139:6-22

⁶Is kegketueni nu mehitenged kediey ne utew egkein-inuwi; kenè ku heini egkesavut.

⁷Hendei e man ebayà para melikayi ku is Mulin-ulin nu? Egkehimu ve he ed-elesan ku sikew?

⁸Emun edhendiyà a te langit, ne ziyè ka; emun edhendiyà a te iveyaan, ne ziyè ka zaan.

⁹Emun be e zà ebpekelayang ne edlayang a pehendiyà te edsilaan etawa ziyà a ed-ubpà te utew meziyù he ziyà te edsenlepan,

¹⁰ne zutun ka is ed-aǥak wey edtavang kedì.

¹¹Minsan mebpetambun e pa te merusirem wey minsan meveeli pa he mezukilem heini is kerayag he nekeliǥuy kediey kenà a ebpekeeles.

¹²Su minsan is merusirem ne kenà merusirem diyà te kenikew, ne is mezukilem iring ded kerayag te maandew.

¹³Nekilala a kenikew su iyan ka mibaal te tivuuk he lawa ku. Iyan ka mibpurma kediey ziyà te ǥetek te iney ku.

¹⁴Edeliǥen ku sikew su egkein-inuwan is kebeeli nu kediey. Egkein-inuwan is menge vaal nu, ne netuenan ku heeyan.

¹⁵Neehè nu is menge tulan ku hein mibpurma a kenikew ziyà te seled te ǥetek te iney ku.

¹⁶Naahà ad kenikew minsan hein wazè e pa mepurma. Is kahabet te menge andew te kegkeuyag-uyag ku ne nekesurat en diyà te libru nu, minsan wazè pa mebpuun is untung ku.

¹⁷He Megbevayà, kenè ku egketegkad is menge ed-isipen nu; utew heini mahabet.

¹⁸Emun ebilangen ku heini ne edhuna pa he mahabet te menge pantad. Te kegkepukew ku, is isip ku ziyà gihapun te kenikew.

¹⁹He Megbevayà, berakat he ebpenhimetayan nu is menge lalung! Berakat he mebpekeziyù kayi te kediey is menge ebpenhimatey te menge etew.

²⁰Mezaat is menge lalag dan mehitenged kenikew. Heini is menge kuntada nu, undaunda is kedsempita zan te ngazan nu.

²¹Nengazen, egkeepesan ku is egkeepes kenikew. Egkeepesan ku is ebpekigkuntada kenikew.

²²Utew ku egkeepesi sikandan; mid-isip ku sikandan he menge kuntada ku.