Yabura 56:1-9

¹Dawuda xa suuki bɛɛtibae xa mangɛ bɛ. A xa ba alɔ bɛɛti naxan xili, «Ganbɛ na wuri makuye fari.» A a ba Filisitakae a suxu tɛmui naxɛ Gati.

²Ala, hinnɛ n na barima mixie na n gerefe. E gere tima n bɛ tɛmui birin.

³N yaxuie fɛɛɲɛnma gere ra. Ala Xungbe, n gerefae bara wuya.

⁴N na gaaxu tɛmui naxɛ, n nan n xaxili tima i tan nan na.

⁵N Ala xa masenyi matɔxɔma. N mu gaaxuma sɔnɔn, barima n bara la Ala ra. Ibunadama gbansan nɔma munse rabade n na?

⁶Tɛmui birin n yaxuie wama n tɔɔrɔfe e xa wɔyɛnyi ra. N ma fefe mu rafanxi e ma.

⁷E lanxi n ma ɲaxankatɛ ma, e bira n fɔxɔ ra yire birin alako e xa n faxa.

⁸I naxa tin e xa ratanga e xa fe ɲaaxie ma. Ala, i xa xɔnɛ xa e rabira.

⁹I n ma duniɲɛigiri kolon, i n yaye toxi. N ma tɔɔrɛ birin sɛbɛxi i yi ra.