Kap 56:1-9

¹Dewit dakon kap kɨnda. On kap do “Miktam” yaŋ yoŋ. Uwalni Pilistia amɨn da Gat kokupmon Dewit tebaisi abɨdawit bɨsapmon Dewit da kap on mandagɨt. Kap yoŋ amɨn dakon kɨla amɨn da mɨŋat amɨnyo yoyɨŋban “Kɨnarɨm kɨnda dubagɨkon kɨndapmon yɨkdak” uŋun tegon da yoni. Piŋkop, nak do nandaŋ yawok nabi. Amɨn da nak nɨt do aŋek nolgaŋ. Gɨldat kɨnda kaloŋ uwalno da nɨt do abaŋ.

²Wɨsa dagokdo da wɨgɨ pɨlɨndosi uwal da nɨt do pi aŋ. Amɨn morapmɨ da iyɨ do nandaba wɨgakwa abɨŋ nep do aŋ.

³Piŋkop, yo kɨnda do pasoldot bɨsapmon, egɨp egɨpno gagon tosok yaŋsi nandɨsat.

⁴Egɨp egɨpno Piŋkopmon tosok yaŋsi nandaŋek geni bamɨsi do nandak nandak aŋek mani awɨgɨsat. Nak Piŋkop nandaŋ gadaŋ ɨmɨŋek yo kɨnda do dɨma pasolgeŋ. Amɨn da nak do yo kɨnda arɨpmɨ dɨma ani.

⁵Yo morap akdɨsat uŋun uwal da paŋupbal ak do pi aŋ. Toktogɨsi nak aŋupbal ak do kosit wusɨk aŋ.

⁶Uŋun kɨsi muwugek si pasɨlek ekwaŋ. Nak da kosit agɨsat uŋudon yubɨŋek nɨkba kɨmokgeŋ do pi aŋ.

⁷Piŋkop, gak da aŋpak yokwi aŋ uŋun do yo yokwisi aŋ yobi. Gak butjap nandaŋ yomɨŋek emaron teban taŋek pabɨŋ yopbi.

⁸Jɨgɨ pasat uŋun gak da nandɨsal. Aŋek nak uŋun do jɨgɨsi nandaŋek kunam tagegɨsat. Kunam pakbino niaŋ da moŋ uŋun gak da manjɨŋek papiagokon kɨlɨ mandal.

⁹Nak yaŋsi nandɨsat, Piŋkop uŋun paŋpulugokno, do bɨsit aŋ ɨbeŋ bɨsapmon uŋun da uwalno yolban kɨŋ mudokdaŋ.