Mbouŋ To Yes Israela 56:1-9

¹Mbouŋ to David Mbouŋ tane iŋarui saawe tau yes Pilistia tikis David izi nugh Gat. Aliiŋa tauvene: ‘Mbuun tau ileep nugh malau ve ineneeŋ mon.’ O Maaron, yau besooŋa tsio. Lolom isaghatin ghau, ve uul ghau lak! Pa koiagŋa tinanaan ghau ne. Mboŋ ve mataaz, tamtamon tizuari zi tighe le titatan ghau.

²Saawe isov, yes tau tiŋgalŋgal saveeŋ payau ne, tighamgham lilin ghau tighe tirav ghau namaat. Yes tau tighamgham malmal payau ne, eval kat.

³Maaron, yo Maaron Tiina Tau Uliiv Zimaronŋa Tisov. Saawe tau roiŋ tiina igham ghau, yau aat nanumeer ghom.

⁴Yau napakur Maaron pa saveeŋ mbuaaŋ tooni, ve naghur ila tooni ariaaŋ. Irau naroi mako. Pasaa, tamtamon to taan tapirizi igheen sindei, leso tivaghamun ghau? Mako.

⁵Saveeŋ tsiau, ene poia. Eemon saawe isov, ta mboŋoozo ila le ravrav izi, koiagŋa titortoor aliŋag muul imin saveeŋ saghati. Ve tiliil eez tighe le tivaghamun ghau.

⁶Tilup zi ve tipapadeu pa laghooŋ tsiau, ve tisasaŋan tighe tirav ghau namaat.

⁷Maaron, puughu mindai ta upul zeran sasaghati tawe tileep? Uyat ŋgar toozi tawe lak! Utotoi aatyavyav tsio pazi, ve utatan zi, leso tapirizi isov kat!

⁸Yo uwatagh: Yau nabaad pataŋani naol ve nataŋtaŋ. Eemon pataŋani tsiau isov, yo ubood zi ila rau tsio wa. Ve naghe matag suuru paam, uwatoa ila yaa paatu tsio, ve ughuru igheen. Leso matam iŋgalŋgal ŋgar ma pataŋani tau ivotvot payau ne.

⁹Maaron, yau nawatagh: Yo uvolvool tsiau. Tauvene saawe tau ighe nataŋ rarai ghom pa uleeŋ, yo pale uul ghau, ve ugham koiagŋa titoor zi, ve tighau muul tila.