Y Salmo Sija 147:1-15

¹FANMANALABA jamyo as Jeova: sa mauleg na utacantaye alabansa sija gui Yuusta; sa magof este; ya y alabansa respetao.

²Si Jeova jumajatsa Jerusalem: ja fandadaña y manmayute juyong guiya Israel.

³Janafanjomlo y manmayulang na corason, ya jabee y chetnotñija.

⁴Jasangan y numeron y pution sija; jafanaan todo sija ni y naanñija.

⁵Dangculo y Yuusta, yan matatnga gui ninasiña; tiningoña taeuttimo.

⁶Si Jeova jumajatsa y manmanso: ya jachule papa y manaelaye gui jilo oda.

⁷Cantaye si Jeova ni y finatinas grasias; cantaye alabansa sija gui atpa, para y Yuusta.

⁸Ni y jatatampe y langet ni y mapagages, ya jalilisto y ichan para y tano, ya janafandodoco y chaguan gui jilo ogso sija.

⁹Güiya numannae y gâgâ sija nañija, yan y fumaguon y aga sija ni y manaagang.

¹⁰Güiya ti ninamamagof ni y ninasiñan y cabayo: ni ti ninamamagof güe ni y adeng y taotao.

¹¹Si Jeova ninamamagof güe ni y manmaañao nu güiya, ni y umangoco sija gui minaaseña.

¹²Alaba si Jeova, O Jerusalem; alaba si Yuusmo, O Sion.

¹³Sa janafanfitme y rejas y trangcamo: jabendise y famaguonmo gui sumanjalommo.

¹⁴Jafatinas pas gui jalom uttimomo, ya ninabula jao ni y guesmauleg na trigo.

¹⁵Janajanao y tinagoña gui jilo tano: y sinanganña malalago goschadig.