SALMOS 147:1-15

¹Xijpaquilismacaca TOTECO pampa nelía cuali para tihuicase tiohuicat para ya. ¡Nelía cuajcualtzi huan quinamiqui!

²TOTECO sempa quicualtalis altepet Jerusalén, huan quinsentilis nopa israelitame cati quinsemanqui, huan itztoque ipan sequinoc talme quej seyoc tali ehuani.

³Yaya quinyolchicahua cati quipiyaj yoltequipacholi huan quinpajtía campa mococojtoque.

⁴Yaya quimati quesqui imiyaca sitalime onca huan sesen quintocaxtalijtoc.

⁵Toteco nelía hueyi huan quipiya miyac chicahualisti. Italnamiquilis amo aqui hueli quitamimachilía.

⁶TOTECO quinhueyitalía cati moechcapanohuaj, pero nochi amo cuajcualme quintahuisos talchi.

⁷Xihuicaca para anquitascamatise TOTECO. Xihuicaca por nochi cati quichijtoc toDios huan xitatzotzonaca ica arpa.

⁸Toteco yaya quitzacua ne ilhuicacti ica mixti. Yaya taahuetziltía ipan taltipacti. Quichihua ma moscalti xihuit ipan cuatitamit.

⁹Yaya quintamaca nopa tecuanime cati nemij cuatita. Ininpilconehua nopa cacalot quintamaca, quema pehuaj chocaj pampa mayanaj.

¹⁰Quema Toteco quiita se cahuayo cati motalohua chicahuac, o quema quiita se tacat cati quipiya miyac fuerza, amo paqui por ininchicahualis.

¹¹Pero TOTECO quipantía miyac paquilisti ipan masehualme cati quitepanitaj. Quipantía miyac paquilisti ipan cati mochiyaj ipan ya iteicnelilis.

¹²Nochi amojuanti ipan ni altepet Jerusalén, xijhueyimatica TOTECO. Quena, nochi cati itztoque ipan tepet Sion, xijpaquilismacaca amoDios.

¹³Pampa yaya cuali quitzactoc icaltehua amoaltepe para amo hueli quitapos yon se amocualancaitaca. Huan yaya tahuel quintiochijtoc amoconehua.

¹⁴Yaya quititanis tasehuilisti ipan nochi amotal, huan amechmacas trigo cati más cuali para ica ximopanoltica.

¹⁵Yaya quintitanis itanahuatilhua ipan nochi taltipacti. Huan quema yaya camanaltis, icamanal nimantzi ajsis hasta campa hueli techaj.