Yɛbəc 5:16-23

¹⁶Kənay ka afum aŋɛ ŋanayi sədare nsɛ sənakɛl Yerusalɛm mɔ, ŋaŋc-yɛksɛ kəkɛrɛ Yerusalɛm atɔtamnɛ kɔ afum aŋɛ yɔŋk yɛlɛc yɛnasɔŋ dɛbəc mɔ nde asom a Yesu ŋanayi mɔ, fəp faŋan anataməs ŋa.

¹⁷Wəloŋnɛ wəpɔŋ kɔ asadisi aŋɛ ŋasol mɔ ŋayɛfɛnɛ kəraca.

¹⁸Kɔ ŋantəp asom a Yesu waca kɔ ŋambɛr ŋa dəbili.

¹⁹Pibi papɔkɔ disrɛ kɔ mɛlɛkɛ ma Wəbɛ Kanu meŋgbiti cumba ca bili babɔkɔ, kɔ mowurɛnɛ ŋa. Kɔ mɛlɛkɛ moloku ŋa:

²⁰«Nəkɔ kəlɔ kəpɔŋ, nəloku afum moloku kɔ mes fəp ma tɔkɔtɛnɛ ta doru dandɛ.»

²¹Ntɛ ŋane moloku mamɔkɔ mɔ, kɔ asom a Yesu ŋaŋkɔ bət-bət suy nde kəlɔ kəpɔŋ, kɔ ŋaŋcop kətəksɛ di afum. Kɔ wəloŋnɛ wəpɔŋ ender kɔ akɔ ɛnasolɛ mɔ. Kɔ ŋawe aboc kiti aləpəs aSuyif kɔ abeki apɔŋ aka Yisrayel fəp, kɔ ŋasom a pakɔ pawurɛnɛ asom a Yesu dəbili, pakɛrɛ.

²²Kɔ asɔdar ŋafɔ ŋakɔ, mba ŋambəp fɛ ŋa dəbili, kɔ ŋalukus. Kɔ ŋaŋkɔ ŋaloku ti abɛ aŋɛ ŋanasom ŋa mɔ, ŋac-loku:

²³«Səŋkɔ səbəp cumba ca bili pacaŋ ci bel-bel, abum a ci ŋacəmɛ dəkəcəmɛ daŋan, mba səŋgbiti ali fum səŋbəp fɛ bili disrɛ.»