APOSETOLO EDIA KARA 5:16-23

¹⁶Ierusalema kahirakahira hanua taudia momo danu idia haboua. Idia ese gorere taudia bona mai lauma dika taudia idia abia lao, bona ibounai ese mauri idia davaria.

¹⁷Bona Hahelagaia Tauna Badana mai ena bamona taudia, Sadukea edia orea taudia be idia mama bada herea.

¹⁸Vadaeni idia ese aposetolo taudia idia dogoatao, bona dibura ruma lalonai idia koua.

¹⁹To hanuaboi neganai, Lohiabada ena aneru ta ese dibura ruma ena iduara ia kehoa, idia ia hakaua lao murimuri dekenai bona ia gwau,

²⁰“Vadaeni umui lao, Dubu Helaga lalonai umui gini, bona inai mauri matamata herevana ibounai hanua taudia dekenai do umui hadibaia.”

²¹Inai hereva idia kamonai, vadaeni daba maragi neganai Dubu Helaga lalonai idia raka vareai, bona edia hadibaia gaukara idia hamatamaia. To Hahelagaia Tauna Badana mai ena bamona taudia ese, kaunsolo taudia bona Israela ena tau badadia idia haboudia, bona hereva idia siaia dibura ruma dekenai, aposetolo taudia idia hakaua mai totona.

²²Opesa taudia idia lao, to dibura ruma lalonai aposetolo taudia idia davaria lasi. Idia giroa lou bona kaunsolo dekenai idia hamaoroa, idia gwau,

²³“Dibura ruma dekenai ai ginidae neganai iduara be koua namonamo, gima taudia danu iduara badinai idia gini, to iduara ai kehoa neganai, tau ta ai davaria lasi.”