Yɛbəc 13:26-43

²⁶Awɛŋc im aŋa, nəna awut aka dokom da Abraham, kɔ nəna akɔ nəŋnesɛ Kanu mɔ, səna ŋɔ anakɛrɛ toloku ntɛ tendeyac su mɔ.

²⁷Mba aka Yerusalɛm kɔ abɛ aŋan ŋanacərɛ fɛ fum nwɛ Yesu ɛnayɔnɛ mɔ. Ŋanagbɛkərɛ fɛ sɔ moloku ma sayibɛ-e mmɛ aŋc-karaŋ dɔsɔk o dɔsɔk da kəŋesəm mɔ, mba ŋanader ŋalas moloku mamɔkɔ ntɛ ŋanabocər Yesu kiti mɔ.

²⁸Ŋanasɔtɔ fɛ ntɛ o ntɛ tɔkɔ pənamar a ŋadifɛ Yesu mɔ, mba ŋantola Pilat kədif kɔn.

²⁹Ntɛ ŋalip kəyɔ mes fəp mɔkɔ anacic tetɔn mɔ, kɔ ŋantorɛ kɔ dəkətɔk kəpəmpəl, kɔ ŋaŋkɔ ŋaboc kɔ dəkufu.

³⁰Mba Kanu kənayekti kɔ afum afi dacɔ.

³¹Kɔ Yesu owurər mataka mɛlarəm akɔ ŋanapɛ kɔ nkɔn kəyɛfɛ Kalile kəkɔ ka Yerusalɛm mɔ. Ŋa ŋayɔnɛ oŋ aŋɛ ŋanatəŋnɛ kəyɛfɛ ka Yesu afi dacɔ mɔ, ŋa ŋantam sɔ kəluksɛ ti afum alɔma.

³²Kɔ səna toloku tɔtɔt tatɔkɔ tɔ səloku nu: Temer mpɛ anasɔŋ atem asu mɔ,

³³Kanu kəlasɛ su ti bel-bel, səna dokomɛnɛ daŋan, kəyekti ka Yesu, pəmɔ tɔkɔ aŋcic ti Yabura Dawuda ya mɛrəŋ disrɛ mɔ: ‹Wan kem məyɔnɛ, bawo in’ okom əm kəyɛfɛ mɔkɔ.›

³⁴Kanu kənaloku a kəndeyekti kɔ afi dacɔ, ntɛ tɔŋsɔŋɛ ta oluksərnɛ pəte mɔ. It’ ɛnasɔŋɛ pəloku: ‹Indesɔŋ un memer mosoku mmɛ inasɔŋ Dawuda mɔ, memer mmɛ mɔyɔnɛ kaŋce mɔ.›

³⁵Itɔ Kanu kəlokɛnɛ kəfo kəlɔma Yabura Dawuda disrɛ: ‹Məfɔdesak Wəsoku wəkam pəte dəkufu.›

³⁶Dawuda nkɔn ɛnabəc tɛfaŋ ta Kanu dɛtɛmp dɔn disrɛ, k’ɛfəntərɛ k’efi, k’awup kɔ nde atem ɔn kəsək, k’ente dəkufu.

³⁷Mba fum nwɛ Kanu kənatimi afi dacɔ mɔ, nkɔn ɛnate fɛ.

³⁸Awɛŋc im aŋa, nəcərɛ ti: Teta nkɔn Yesu t’ aŋcamɛ nu kəŋaŋnɛnɛ ka kiciya, kiciya nkɛ sariyɛ sa Musa sənatɔ-tam kəsɔkəs nu mɔ.

³⁹Ti disrɛ, nwɛ o nwɛ omboc kəlaŋ kɔn nnɔ Yesu eyi mɔ, Kanu kəndesɔkəs kɔ.

⁴⁰Nəkɛmbərnɛ ntɛ tɔŋsɔŋɛ mes mɔkɔ sayibɛ-e ŋaŋcic mɔ ta mɛbəp nu:

⁴¹‹Nəmɔmən nəna afum aŋɛ nəbɔtər kəfani mɔ! Nəyi pəciyanɛ disrɛ, nəsɔlɛ! Bawo ina kəyɔ k’inder tes tɔlɔma kiyi konu doru kaŋkɛ disrɛ, tes ntɛ nəntɔdelaŋ kɔ fum olok’ un ti-ɛ.›»

⁴²Dəkəwur daŋan, kɔ afum ŋalɛtsɛnɛ ŋa kəder sɔ dɔsɔk da kəŋesəm dɔkɔ dender mɔ kədegbɔkərɛ moloku min mayi.

⁴³Ntɛ kənay kəsakətɛnɛ mɔ, aSuyif alarəm kɔ akɔ ŋambɛrɛ dinɛ d’ aSuyif mɔ ŋaŋcɛpsɛ Pol kɔ Barnabas kəlok-loku kəŋan disrɛ. Kɔ akakɔ ŋasɛp kəcəpəs ŋa bəkəc teta kəsumpər kəmar ka Kanu.