Mgo Hinimuan 13:26-43

²⁶No kagi ni Pablo to, “Mgo sulod no mgo pinanganak ni Abraham woy tibo kaniu no ogtahud to Magboboot, pamminog kow. Sikanta, nigpaalapan ki to Magboboot to soini no nangnangonon noy tongod ki Hisus su oyow ogkapangabangan kid to mgo salo ta.

²⁷Di ka mgo taga Hirusalim woy ka mgo igbuyag dan, agad to tibo no Allow to Oghimoloy, ogdinogon dan man do ka ingkasulat dongan to mgo talagnangon to kagi to Magboboot, di waro dan tokora to si Hisus ka lagboy no ingkatuon no Igbuyag dan. Woy songo waro dan masabuti ka ingkasulat dongan to mgo talagnangon to kagi to Magboboot. Di ko pigbobootan dan to ogpohimatayan si Hisus, natuman dan on ka sikan no dongan no ingkasulat.

²⁸Nò, agad to waro nigkita to agad nokoy no salo no litos to pogkamatoy ni Hisus, di nigbuyu dan dod ki Pilatu to oyow ogpohimatayan din on.

²⁹No ko natuman on to mgo otow ka tibo no ingkasulat dongan tongod to pogkamatoy rin, nig–awo dan on ka lawa rin no inlansang dio to krus. Woy insabal dan on dio to sabalan to namatoy.

³⁰Di nig–uyag on to Magboboot si Hisus ligkat to kamatayon din.

³¹No ka tahan no nigdumaruma kandin nokani ligkat to Galilia taman to nokouma on sikandan dio to Hirusalim no waro pad mamatoy sikandin, ian ka malasi pigpakita ni Hisus to lawa rin no nouyag on. No kuntoon, sikan dod ian no mgo duma rin ka ogpakapamalogot to soini no ignangonnangon noy to mgo otow tongod ki Hisus.

³²Kuntoon, ognangonan noy sikaniu to soini no Maroyow no Nangnangonon. Sikan dod ian ka insabut to Magboboot dongan to mgo kaap–apuan ta.

³³No pigtuman din on kai to kanta no mgo pinanganak dan su nig–uyag din on si Hisus ligkat to kamatayon din. Ka sikan, nig–ayun to sikan no ingkasulat dongan to sikan no igkaruwa no Salmos to kagi to Magboboot to: ‘Anak ku sikoykow. No kuntoon, igpatokod ku to sikanak ka Amoy nu.’

³⁴Woy soini rod ka insabut to Magboboot dongan to og–uyagon din on si Hisus ligkat to kamatayon din woy to kono ogkamolu ka lawa rin. Ian su impasulat din to, ‘Tu–tuu ian no ogtumanon ku koykow ka innangon ku dongan ki Dabid no mgo karoyawan.’

³⁵Woy duon dod impasulat to dangob no Salmos to, ‘Kono ka ogbogoy ko ogkamolu ka lawa to sikan no Matuwarong no Suguanon nu.’

³⁶Di si Dabid, nigtuman din ka sugu to Magboboot to kandin no pog–ugpo nataman do to kandin no pogkamatoy. Pogkaponga, no inlobong dan on ka lawa rin dio to longod to mgo lobong to mgo apu din no namolu on ka kandin no lawa.

³⁷Di si Hisus atag no nig–uyag on to Magboboot ligkat to kamatayon din, waro atag mamolu ka kandin no lawa.

³⁸Nò mgo sulod,” kagi ni Pablo, “Ogpohitagaan noy lagboy sikaniu to, ligkat to nohimu ni Hisus, ogkapasaylu ka mgo salo ta.

³⁹Woy ligkat dod kandin, agad hontow no ogtuu kandin, ogkohimu on no maroyow dio to tangkaan to Magboboot. Di waro agad hontow no ogkohimu on no maroyow ko ogligkat to pogtuman din poron to mgo Balaod no inggalat ni Moisis.

⁴⁰Nò, sikan ian,” kagi ni Pablo, “Ayad-ayad kow oyow kono ogkatuman duon to kaniu ka impanangon to Magboboot dongan to sikan no mgo talagnangon to kagi rin to,

⁴¹‘Sikaniu no ogsusumpalit, pamminog kow su duon oghimuon ku to kaniu no pog-ugpo no lagboy no igkabolongbolong now. Di agad ko duon og-ay-ayaran no ognangonnangon kaniu to sikan, di kono kow ogtuu no ogkammatoy kow ro duon.’ ”Sikan do ka innangon ni Pedro to mgo otow.

⁴²No to poglibuwas dan to anaranan, nangamuyu ka mgo otow ki Pablo daruwa ki Birnabi oyow ogpalibongon to songo simana ko Allow ran to Oghimoloy su oyow oghutuk no ogpamminog to ignangonnangon dan.

⁴³Pogkaponga ran on to sikan no poglimud dan, mohon–ing ka mgo Hudiu woy ka kono no Hudiu no ogtahud to Magboboot no nokani nighalin to tinuuan to mgo Hudiu, no nanduma ki Pablo woy ki Birnabi. No duon innangonnangon woy si Pablo kandan woy nig–os–osonan dan to oyow kono dan ogloko to dakol no pogkohoy–u to Magboboot kandan.