Hechos 13:26-43

²⁶Jaskara iken nokon wetsabó: Mato Abrahamman rarebobaon bakebo itan ja Dios akin shinannai judíoma jonibo. Nato jan kishpinti joira matona iki.

²⁷Jaskara ikenbira, jaton joni koshiboyaxonbi ja Jerusalénhain ikábaon Jesús onanyamakana iki; jainxon ja *profetabaon wishani meran yoiai joibo, ja tantiti netetiibi yoyo akinbi, onanyamareskana iki. Jaskáakin onanyamaxonra. Jesús retekana iki, ja Wíshakan yoiai keskábo senenmakin.

²⁸Jainxon jakopi reteti yamakenbira, jato retemanon ixon Pilato yoikana iki.

²⁹Jatian Jesús jaskáati kirika meran yoiai keskábo ayonxon, mawáketian korosenmea pakexon shanka kini meran miinkana iki.

³⁰Jaskáakankenbira Diossen jirimaa iki.

³¹Jaskatax ja netebaon ichabiresi jawen jonibo Galileankoniax Jerusalénhain boaiboki Jesús pikota iki. Jaskarabo jatonbi oinna ixonra, jabaon akai, rama ja Jesús ikábokiriakin jato yoikin.

³²Jaskara ikenra, nonribi ja jakon joi mato yoii iitai; ja moatianbi non reken papashokobo jaskáati Diossen yoini jawékira,

³³rama ja noa jaton rarebobo iketian, noa senenhaxonke, ja Jesús mawákenbi jirimaxon. Ja Salmos capítulo rabéain yoiai keská: ‘Mia riki nokon Bake, rama riki ea min Papa’, iki iká.

³⁴Diossenra moabi yoia iká iki, mawákenbi jirimaxon jawen yora payómatima. Jaskáati ixonra, jawen kirika meran neskáakin jato wishamaa iki: ‘Enra ja kikin jakonhira itan ikonkon ja David axonti yoinibo senenhaxonti jake’, akin.

³⁵Jaribi yoii ikai Wishá meran neskati: ‘Ja min jakon yonotinin yorara, min payómatima iki’, iki.

³⁶Ikon riki, Davidkanra jabé senen jakatiai jonibo jato akinna iki, ja Diossen ati yoiai keskáakin. Jaskáa pekáo iiti, jaribi mawáketianra jawen anibo minmeetainkoribi miinkana iki, jainra jawen yora payota iki.

³⁷Ikaxbi ja Diossenbi jiria jonin yorara, payóyamaa iki.

³⁸Jaskara iken, rama onankanwe nokon wetsabó, ja Jesús kopires, jaton ochabo Diossen shinanxontima joi non mato yoiai.

³⁹Ja ochabora, Moiséssen esekan soati atipanyamaa iketian, mato Diossen jakonhakin ointi atipanyamaa iki, ikaxbi jatíbi já ikonhaibora, Diossen ja ochabo moa jato shinanxonyamai.

⁴⁰Jaskara iketian koiranmeekanwe, ja *profetabaon jaskáti yoini keskára mato winonake. Jabaonra neskáakin wishanike:

⁴¹‘Rama oinkanwe, shiroresai jonibo, rátetax moa keyo jabátankanwe, enra nato netebaon, ratétibires jawékibo anóxiki. Oinxon mato wetsabaon yoiabira maton ikonhayamanoxiki’, iki iká —akin jato aká iki.

⁴²Jatian Pablo betan Bernabé, ja tsinkíti xobo meranoax moa pikókainbekonaitian, ja weikana judíobaon yokákana iki, wetsa tantiti neten ja joiboribi jato yoiribinon ixon.

⁴³Ja tsinkíti xobo meranoax moa tsinkiti senenxon, icha judíobaon itan judío jikia Dios ikonhabaonribi, Pablo betan Bernabé chibankana iki. Jaskákanaitian Pablo betan Bernabékan jato esea iki, ja Diossen jato noixon kenaabo ikax, jaki koshii jenékantima.