Aposel 13:26-43

²⁶“Turau tar, Abraham gere tar ado, haiden ã Negur nigin anini gedig, Negur tamo kayau kel yaleya nẽ od, amã bun sur fen.

²⁷Jerusalem tamo kayau, dogo neid mudur adodo geid, Jesus ado, profet neid od Sabat naa ganan bun diwesedig anĩ to kelei ken, Jesus bouwa bun od dun, anĩ bunem profet neid od kisi fel wõ yen.

²⁸Idi Jesus dukesiyouf nigin, gariya taka to dilen, anĩ ere, idi ĩ dukesiyouf nigin, Pailat dirokenen.

²⁹Idi Jesus nigin Negur nẽ Itotoya bun yenek anĩ ganan, dõ de age difel fen, idi ĩ aa tetek bun tamal dalisne ken, matmat bun dinenen.

³⁰Anĩ ere, Negur Jesus laa bun tamal kel turĩ fe di, mata kel fã yen.

³¹Agef fen, Jesus, tamo idi, ĩ geid Galili teneub bun tamal Jerusalem dilen anidi bun, naa musei wõ yen. Idi anidim gama, tamo kayau bun, ĩ nigin wogõ def dilef.

³²“Amã biya od ã marokeneik, Negur tubumã tar age afouf fiyẽdin are,

³³Jesus kel turĩ fiyen anĩ bunem, amã idi gereneid tar kisi fel naman. Sam tu bun itotoya yenek kilei: “‘Õ neu Kesu, aya gama õ Tamã wõ aul.’

³⁴Negur ĩ laa bun tamal kel turĩ fiyẽ di, ĩ to bagai bura lauf nigin, Negur eig ye iron: “‘Aya momoi bagai nẽ ado fateul nẽ el fiya, are aya Dawid afenẽf aun anĩ, ã afeneĩf.’

³⁵Negur nẽ Itotoya taka buneg eig ye irok: “‘Õ ogon Fateul Tamo to utorõ di, bura lauf.’

³⁶“Dawid ĩ yogon sain bun, Negur nẽ oroya anĩ aruna yale fen, laa fen. Ĩ tubu tar geid mũ dife di, bouwa bura len.

³⁷Anĩ ere, Negurem laa bun tamal kel turĩ fiyen ĩ, bura leya san.

³⁸“Anĩ nigin, turau tar, ã keleĩ youf, Jesus bunem mosor weder tu keleya nigin od wogõ yeik.

³⁹Tamo ganan Jesus nigin momoi def, mosor ganan yalelkeneĩd fen, madur fedif, anĩ ere, Moses nẽ Lo bunem, tamo neid mosor ganan yalelkeneĩd fen, madur fediya kisi feleya sã.

⁴⁰Anĩ nigin, profet wogõ den anĩ, ã bun to wõ youf nigin lo weleg:

⁴¹“‘Ulegef, ã kono fiya tamo! Terẽg fen, gare gouf, ere nigin, aya ãgenei sain bun ereb taka age afouf, are taka nem irokeneĩfeg, ã to bagai momoi gouf.’ ”

⁴²Pol Banabas ado, Juda neid uub fõ ditor dile mog, tamo kayau, Sabat naa taka bun, od enei baban tobol difouf nigin dirokenẽdin.

⁴³Tamo kayau dilele di, Juda tamo kayau musei ado, haiden Juda neid momoiya bun falei de fen, Negur nigin anini dedig musei idi, Pol Banabas ado dõ difedin. Age dife di, Pol Banabas ado weim wogõ de fen, idi Negur nẽ wau ifenẽya bun toku dibodõf nigin waud dalesen.