De Postle Dem 13:26-43

²⁶“Bredren, oona wa Abraham chullun chullun, an oona mongst we wa ain no Jew bot da woshup God, listen op! Dis message bout sabation, God sen um fa we!

²⁷De people dat lib een Jerusalem an dey leada dem ain been know who dat Jedus da. Dey ain know e come fa sabe um. Dey ain ondastan bout de wod dem dey beena read ebry Woshup Day, dem wod dat de prophet dem done write. Stillyet, wen de people condemn Jedus, dey mek wa dem prophet done been write bout Jedus come true.

²⁸De people ain find nottin bad dat Jedus done do fa mek um kill um. Stillyet, dey aks Pilate fa hab um kill Jedus.

²⁹Wen dey done do all dat dem prophet done been write bout Jedus, dey tek um down fom de cross an pit um een a tomb.

³⁰Bot God mek um git op fom mongst de dead people an lib gin.

³¹Jedus appeah plenty time ta de people dat been gone long wid um fom Galilee ta Jerusalem. Now, dem people beena tell oda Israel people all bout um.

³²We come yah fa tell oona de Good Nyews, wa God done promise we ole people dat e gwine do,

³³We dey chullun chullun, an God done do um fa we wen e mek Jedus git op fom mongst de dead people an lib gin. Like dey write een de secon Psalm, God say, ‘Ya me Son. Taday A done come fa be ya Fada.’

³⁴Dey write een God Book bout how God been gwine mek Jedus git op fom mongst de dead people an lib gin, an dat God ain neba gwine leh Jedus body rot. Een e Book, God say, ‘A gwine gii oona dem holy blessin fa true, jes like A been promise David.’

³⁵An so God tell we too, een noda place een de Psalms say, ‘Ya ain gwine leh de body ob de one wa blongst ta ya rot.’

³⁶Wen David done do wa God wahn um fa do, e dead. Dey bury um close ta e ole people, an e body rot.

³⁷Bot de one dat God mek git op fom mongst de dead people an lib gin, e body ain rot tall.

³⁸So den, bredren, A wahn fa mek oona know fa true dat we da tell oona say, dat cause ob Jedus, God paadon oona sin.

³⁹A wahn fa mek oona know dat ebrybody wa bleebe pon Jedus, God da free um fom all dey sin dat Moses Law ain been able fa free oona fom.

⁴⁰Oona mus tek cyah den, so dat wa de prophet dem been say ain gwine happen ta oona. Dem prophet say,

⁴¹‘Look yah, oona wa da laugh bout wa God say, oona gwine wonda, an oona gwine dead! Cause A gwine do a big wok een oona day. An eben wen dey tell oona wa dat big wok mean, oona ain neba gwine bleebe um!’ ”

⁴²Now wen Paul an Barnabas beena come outta de meetin house, de people aks um fa come back de nex Woshup Day fa tell um mo bout wa dey jes beena taak bout.

⁴³Wen dey all lef de meetin house, plenty Jew people gone long da waak wid Paul an Barnabas. An plenty people dat ain been Jew bot wa ton Jew an woshup God, dey gone long wid um too. Paul an Barnabas taak wid um an courage um fa trus een God mussy.