Walumi 15:4-22

⁴Kila kinhu chandikigwe ako umwaka chandikigwa kutufunza tweye, muladi kwa kubetela na kuigangamiza tumtamanile Mulungu kubitila Maandiko Gang'alile.

⁵Mulungu yeli chanduso cha kufunga umoyo na kugangamala, yawatende muwe kinhu kimoja kwa kukweleleza viyatendile Yesu Kilisito,

⁶muladi mweye mose kwa moyo umoja na sauti imoja mumgwee nhogolwa Mulungu, Tata wa Mndewa wetu Yesu Kilisito.

⁷Igonekeni, mugale ukulu kwa Mulungu, kamba Kilisito viyawagoneke mweye.

⁸Kwavija nowalongela, Kilisito kawasang'hanila Wayahudi kuwalagusila Mulungu kotenda kija kiyalongile, kotenda kija kiyailagane na wahenga zao kilawilile,

⁹na kuwatenda wanhu haweli Wayahudi wamgwee nhogolwa Mulungu kwa bazi jake. Kamba Maandiko Gang'alile vigalonga, “Avo, nokugwaa nhogolwa kwa wanhu haweli Wayahudi, nokwimba nyila za kuditogola twaga jako.”

¹⁰Vivija golonga, “Wanhu hamwili Wayahudi deng'heleleni hamoja na wanhu wa Mulungu!”

¹¹Vivija golonga, “Wanhu wose hamwili Wayahudi, mtogoleni Mndewa, makabila gose ga mwiisi, mtogoleni Mndewa!”

¹²Vivija mtula ndagu wa Mulungu Isaya kolonga, “Kolawilila munhu mulukolo lwa Yese, nayo kowatawala wanhu haweli Wayahudi, na wao womtamanila.”

¹³Mulungu yotamaniligwa, yawatende mudeng'helele ng'hani na muwe na tindiwalo kwa kumtamanila kwenu, muladi kutamanila kwenu kukule kwa udahi wa Loho Yang'alile.

¹⁴Ndugu zangu, niye nogesa mweye munoga ng'hani, na mna nzewele zose na modaha kuifunza wenyego.

¹⁵Lakini mna ibaluwa ino sidumbile kwandika mbuli za kuwakumbuseni mbuli ndodo ziiyeka, nhenda avo kwavija Mulungu kangwaa ng'hekewa,

¹⁶ya kuwa mtumigwa wa Yesu Kilisito kwa kuwasang'hanila wanhu haweli Wayahudi. Nosang'hana kamba mulava nhosa kwa kuwapetela wanhu Mbuli Inogile ilawa kwa Mulungu, muladi wanhu haweli Wayahudi wawe nhosa itogoligwa kwa Mulungu, itendigwe ing'ale kubitila Loho Yang'alile.

¹⁷Kwa kuilumba na Yesu Kilisito, nodaha kuigodela sang'hano yangu kwa Mulungu.

¹⁸Silonga mbuli yoyose iyagwe, ila mbuli ija iiyeka iyaitendile Kilisito kubitila niye, kuwalongoza wanhu haweli Wayahudi wamtegeleze Mulungu. Nhenda avo kwa kulonga na kusang'hana,

¹⁹kwa udahi wa unzonza na vifukuzi, kwa kubitila udahi wa Loho wa Mulungu. Avo muumwanza wangu kulawa Yelusalemu mbaka Iluliko, niwapetela wanhu Mbuli Inogile yose ya Kilisito.

²⁰Siku zose nosulukila kuwapetela wanhu Mbuli Inogile kila hanhu hawanadihulika twaga da Kilisito, muladi sekenizenge mna ichandusilo cha munhu iyagwe.

²¹Kamba Maandiko Gang'alile vigalonga, “Wanhu hawanalongeligwa mbuli yake wokona, na waja hawanamuhulika wojuwa.”

²²Lekaavo miyanza mingi ndemelwa kwiza kumwenu.