Men Rom 15:4-22

⁴Pwe karos me intingidier mas o, me intingidier, pwen padaki dong kitail, pweki kanongama o kamait en kisin likau kan kitail en kaporopor.

⁵Ari, Kot en kanongama o kamait en kaminimin komail pena duen Kristus Iesus.

⁶Pwe komail en kalinganada Kot o Sam en atail Kaun Iesus Kristus ni lamalam ta pot o au ta ieu.

⁷I me komail en apapwali pena dueta Kristus me kotin kasamo komail ong lingan en Kot.

⁸Pwe ngai inda, me Iesus Kristus wialar papan sirkomsais pweki melel en Kot, pwen kapwaiada inau kan ong sam akan.

⁹Pwe men liki kan en kalinganada Kot pweki a mak duen a intingidier: I me I pan kadededa komui ren men liki kan o kauleki mar omui.

¹⁰O pil eu me a kotin masani: En popol komail men liki kan iangaki sapwilim a aramas!

¹¹O pil eu: Kapinga Kaun o, komail men liki kan karos o kalinganada i, komail wei karos!

¹²O pil eu me Iesaia masani: Ip en Iese pan pwarado, a pan pwarado, pwen kaunda men liki kan, i me men liki kan pan kaporoporeki.

¹³Ari, Kot en kaporopor en kadire kin komail peren o popol karos ni poson, pwe omail kaporopor en laudeki manaman en Ngen saraui.

¹⁴A ngai asa mau duen komail ri ai kan, me komail dir en kamau o audaudeki erpit, o koiokki ong panapanaui pena amen amen.

¹⁵Ari so, ri ai kan, i inting wong komail er duen met, pwen kataman kin komail mak eu, me Kot kotiki ong ia er.

¹⁶Pwe i en papan Kristus Iesus ong men liki kan, padapadaki wong ir rongamau en Kot, pwe men liki en wiala mairong eu, me konekon, me kasaraui kila Ngen saraui.

¹⁷I me i kak suaiki pan Kristus Iesus pweki meakan me sapwilim en Kot.

¹⁸Pwe i sota pori ong inda meakot, me Kristus sota kotiki ong ia, i en kalua men liki ong peik, ki ai padak o wiawia kan.

¹⁹O kilel o manaman akan, en Ngen saraui. Ari, i me i kadire kila rongamau en Kristus sap karos, tapiada Ierusalem, ap lel ong Ilirien.

²⁰Ngai nantiong ni ai padaki rongamau wasa me saikenta asa duen Kristus pwe i de kauada pon pason en amen.

²¹A duen a intingidier: Me saik kalok ong irail pan kilang, o me sota rong, re pan weweki.

²²Nan i me karompwa ia pan pak toto, pwen sota kak pwar wong komail.