Rom kimbi 15:4-22

⁴Anutunöŋ neŋgöra sihimŋi kewö mörakza: Neŋön kapaŋ köla köhöiba kinda Buŋa Kimbi oyoŋninga urunini naŋgöiga mewö miaŋön jörömqöröm aka malbin. Miaŋgöra Buŋa keu pakpak mönöwök ohogeri, Anutunöŋ mönö miaŋgö dop kusum neŋgimamgö mötza. Miaŋgöra mi ohoget ahöza.

⁵Anutunöŋ mönö nanŋak uruŋini naŋgöiga ölöp kapaŋ köla kin köhöime. Yaŋön mönö Uŋaŋi eŋgiiga inahöm eŋgiiga sutŋine uru jöhöjöhö aka Kraist Jisösgö mötmötŋi wuataŋgöba malme.

⁶Mewö mala ölöp urumohot qakŋe numbuŋini mindiriba Anutu, Kembunini Jisös Kraistkö Iwiŋi mi möpöseiba malme. Anutunöŋ eŋön mewö aka malmegöra mörakza. Mewö.

⁷Kraistnöŋ iŋini möt aŋgön köla köyan köl eŋgimakzawi, miaŋgö dop iŋini mönö mewöyök köyan köl aŋguba malme. Anutugö qetbuŋaŋan sehimapköra mönö mewö aka malme.

⁸Nöŋön keu ölŋi ki jimam: Anutunöŋ keuŋi keuŋi Juda könagesö neŋgö bömönurupnini yeŋgöra jiba jöhöyöhi, miaŋön ölŋambuk akŋapköra mörök. Miaŋgöra Kraist melaiiga Anutugö Buŋa keu ölŋan köhöimapköra aka Juda neŋgö sutnine eta welen qem neŋgiba malök.

⁹Juda nini welen qem neŋgiba malökmö, kantri tosatŋi yeŋön mewöyök yaŋgö ak-kömukömuŋi möta miaŋgöra Anutu möpöseiba malje. Miaŋgö keuŋi mi Buŋa Kimbinöŋ kewö ohoget ahöza, “Miaŋgöra nöŋön kantri tosatŋi yeŋgö sutŋine mala möpöseim gihiba qetbuŋagan sehimapköra liŋet kölakŋam.”

¹⁰Miaŋgö keuŋi kun mi kewö jiba ohoget ahöza, “Anutunöŋ Juda nini möwölöhöm neŋgiiga könagesöŋi aka söŋgaimakzin. Kantri tosatŋi iŋini mönö nembuk toroqeba söŋgaiba köiraŋ ala malme.”

¹¹Miaŋgö keuŋi kun mi kewö, “Kian kantrigö kambu pakpak iŋini mönö Kembu möpöseiba malme. Gölme dop maljei, iŋini mönö körek ‘Anutu saiwap!’ jiba liŋet köla malme.”

¹²Kezapqetok azi Aisaia yaŋön mewöyök miaŋgö keuŋi kewö jii ahöza, “Azi qetŋi Jesi yaŋgö andöjalöŋan mönö sötŋi jula wahöta ambazip gölme dop galöm köl eŋgima. Mewö ak eŋgiiga jörömqörömŋini yaŋgöreŋ ala bauköm eŋgimapköra mamböta malme.” Keu walŋi miaŋön mönö nalö kewöŋe ölŋambuk ahakza.

¹³Uŋa Töröŋaŋgö ösumŋan mönö naŋgöm eŋgiiga jöröm-qörömŋinan köhöiba pöwöwöm akŋapköra mötzal. Miaŋgöra jörömqöröm Toŋi Anutu yaŋön mönö luai qem eŋgiba sösöŋgai pakpak miaŋön uruŋini kokolak qema. Mewö köuluköbiga ölöp Anutu möt narim waŋgiba oyaeŋkoyaeŋ akingö mamböta malme. Mewö.

¹⁴O urumeleŋ alaurupni, nanak eŋgöra kewö möt köhöizal: Iŋini mönö tönpin qahö maljemö, Anutunöŋ yuai pakpak ölöpŋi uruŋine ali kokolak qeiga mötmöt könaŋi könaŋi miwikŋaiba miaŋön ölöp goro qeba kusum aŋgubinaŋgö dop akze.

¹⁵Mewö akzemö, töndup keu mi ölum eŋgubapuköra möta mieŋgö könaŋini mi kunbuk köl gulim eŋgizal. Anutunöŋ kalem möriam niŋgiiga miaŋgö qakŋe kinjalaŋgöra mönö awösamkakak qakŋe keu köhöikŋi tosatŋi ohom eŋgizal.

¹⁶Miaŋgö könaŋi kewö: Anutunöŋ kian kantri eŋön uruŋini meleŋgetka Uŋa Töröŋan mem sarahim eŋgimapköra mörakza. Mutuk jöwöwöl ohogetka köwakŋan öŋgöi Anutunöŋ söŋgaizapma, miaŋgö dop nalö kewöŋe Anutunöŋ ambazip gölme dop buŋaŋi aketka eŋgeka söŋgaimamgöra awöweŋgömakza. Miaŋgöra Ölöwak Buŋaŋi kantri tosatŋi yeŋgö sutŋine jim sehimamgö jiba nupŋi qakne aliga miaŋgö dop urugö nup galöm aka Kraist Jisösgö welenŋi qemakzal.

¹⁷Miaŋgöra Kraist Jisösbuk qekötahöba kinda Anutugö nupŋi membiga qetbuŋa niŋgiiga sileni memba öŋgöba awösamkakak kinjal.

¹⁸Kraistnöŋ kantri tosatŋi yeŋön Anutugö jitŋi tem kölmegöra möta sölölöhöba kuŋgum niŋgimakzawi, miaŋön mönö nam köl niŋgiiga keuni jiba ahakmemeni ahakzal. Keu tosatŋi laŋ jim sehisehigö awösamkakakŋi mi qahö ahöm niŋgiza.

¹⁹Uŋa Töröŋaŋgö ösumŋan mönö nam köl niŋgiiga aŋgöletot aiwesök kukösumŋinambuk asuhuget. Nöŋön Jerusalem siti mosöta kantriŋi kantriŋi liliköba anda mala mala Yuropkö siti qetŋi Ilirikum miaŋgöreŋ aŋgoral. Mewö gölme dop liliköba Kraistkö Ölöwak Buŋa mi jim asarim eŋgim teköyal.

²⁰Kunöŋ tandö kuŋguiga kunŋan kaba nanŋi miriŋi miaŋgö qakŋe memba mönö keuŋambuk akŋa. Miaŋgö dop kunöŋ Kraistkö keuŋan mötnaripkö tandö lök kuŋgui kinöhi, nöŋön mönö kaba yaŋgö tandö qakŋe töndangöba kinda uruŋini toroqeba möhamgöba mem köhöim eŋgimamgö tököba malal. Urugö nup mutukŋi memba miaŋön aködamuni miwikŋaimamgö kapaŋ köla malal. Miaŋgöra ambazip denike yeŋön Kraistkö qetŋi qahö möta tönpin malgeri, nöŋön Ölöwak Buŋa yeŋgöra jim asarimamgö awöweŋgöba malal.

²¹Miaŋgö keuŋi Buŋa Kimbinöŋ kewö ohoget ahöza, “Denike yeŋön keuŋi qahö jiget mötkeri, yeŋön mönö mala i ekŋe. Denike yeŋön könaŋi mutuk qahö möta tönpin malgeri, yeŋön mönö mala mi möt asarime.”

²²Nup mewöŋan jöhöm niŋgiyöhaŋgöra mönö nalö dop eŋgöreŋ kamamgö osiba malal. Mewö.