Roma 15:4-22

⁴Balù tan tagsulat di Tnalù Dwata, fsulatan du fye tamdò gito, du fye fagu di kagtayudito maglala sito, na là magwè di nawaito i galito fatan di fulé duh.

⁵Kayègu ku Dwata i mlala gito, na mlé di gito kgagan tmayud di kaflayam, na mlé di gamu ksasatu nawa di klalòyu ku Krayst Dyisas,

⁶du fye kdeeyu mbaling masasatu di kdayenyu Dwata i Mà Amuito Dyisas Krayst.

⁷Taman tooyu dnawat dad demeyu faglut, du too gamu dnawat Krayst, du fye magdayen Dwata.

⁸Na i mangu di gamu, salu Krayst dini du tmabeng i dad to Dyu, du fye gfiten di dale too glut dnohò Dwata dad tafakangan di dad gutambulla,

⁹du fye balù gamu dad ise Dyu fakay dmayen Dwata gablà di kakdon gamu, du di Tnalù Dwata nun gman Krayst, manan, “Dmayen agu ge Dwata, gagin i dad to ise Dyu, na mlingag agu dmayen ge.”

¹⁰Lêmanan man, “Gamu dad to ise Dyu, too gamu flehew, gagin di dad Dyu, i muna dad to mgalék Dwata.”

¹¹Léan man, “I kdeeyu dad ise Dyu, dnayenyu Dwata i Amu, i kdeeyu dad to, mlingag gamu du dmayen kenen.”

¹²Gman fa Isaya, manan, “Nun duh kadang nun satu bel Dyési magot i dad to ise Dyu, na kenen mgimò gumdà i kdee kafye fatanla.”

¹³Kayègu ku Dwata i gumdà i kdee kafye fatanito, mlé gamu klehew, na ktanak nawa du faglut gamu di kenen, du fye fagu di eneg i Tulusan, too matnù kgal i nawayu fatan i kdee gdawatyu kadang di fulé duh.

¹⁴Dad flanekgu faglut, gadègu i dad nimòyu too fye, na gamlabat gamu Tnalù Dwata na fakay gamu satdò.

¹⁵Kabay balù ani, dini di sulatgu ani, là agu gdè smulat én gatdògu di gamu di muna, fye làyu glifet dun. Là agu gdè, du nun glalgu mdà di Dwata,

¹⁶du deg satu to tmulen gablà ku Dyisas Krayst di gamu dad ise Dyu. Salngad agu satu bà di Dwata, du mdà di deg nun faglut di kenen, na ale mgimò dsùgu i gdawat Dwata du mlaneb ale fagu di Tulusan.

¹⁷Na du mdà di ktabeng Dyisas Krayst deg, là agu myà tmulen i kdee gagangu nimò, i fimò Dwata deg.

¹⁸Kabay én alògu tulen i nimò Krayst fagu di deg, dunan nun dad to ise Dyu mgebegu di kafaglut di Dwata, fagu di tagmangu na i tamgimògu di dale,

¹⁹na fagu di eneg i dad tnikeng, i mdà di kgal Tulus Dwata. Taman di kagugu mdà di banwe Dyérusalém kel di banwe Ilirikum too agu tmulen di dad to i Fye Tulen gablà ku Krayst.

²⁰Tamlo kayègu tamdò i Fye Tulen di dad banwe i dad to là fa mlinge gablà ku Krayst, du là agu mayè lêman tamdò gablà di kenen di dad to tamatdò i dademe dad to.

²¹Kayègu dmohò i gman di Tnalù Dwata, manan, “I dad to là fa mlinge gablà di kenen, lingela kadang, na i dad to là fa magtulen, glabatla kadang gablà di kenen.”

²²Na du kayègu tamdò i Fye Tulen di dee banwe, én guganggàgu mlauy gamu.