Romanos 15:4-22

⁴Dutyatu beru Yusuja quisarati ecuana bahuitya ishuque ehuene jucuare. Tuja quisarati eque ecuana Yusura adebamereya ecuana canerecatiyaque abacata idu ataquique. Tuja quisarati eque tura ecuana casaturaya. Tuja quisarati eque tura ecuana bahue amereya ejeque huecaca ecuana Ecuana Cuatsashaqui queja judirubuqueque ni eje tupu tuque jaca ishu ama.

⁵Yusura ecuana tsahuaya canimehuallatima canerecati cuana idu ishu. Tuquetu Ecuana Nime Casaturaquique. Tura netsahuacue Cristo Jesúsra anishacara aya eque ani ishu.

⁶Ecadutyati nejucue Ecuana Cuatsashaqui Jesucristoja Etataque pureama aishu.

⁷Iyuhueda tsehue nebacue peya cuana, Cristora micuana baya bucha. Micuana jadya cabatie juyaju, peya cuana jadya paju: “Yusu tu dyaque jida, tuja cuanaque peya cuana tsehue iyuhueda cabatiya tibu”.

⁸Riyaque micuana cuejacara aya. Berutu Yusura ecuanaja ebaba ecana Einajacamerequique cuadishadadiya jadya acuare. Jadya equetu Cristora junatsu bahue amerehua Yusura eje bucha quisarati iyatsu tuequedya ayaque.

⁹Israelita cuana Ijahua quejaque inajacamereratu jehua. Tumebaedya tujatu inajacamerehua israelita ama cuanaque, tunaja dyadi tumebaedya Yusu jadya aishu: “Micuetu dyaque quiyuhuebati anihua ecuana tsehue, Tata”. Ehuene tu Yusura David “Huenecue” jadya ahuaju huenecuareque. “Israelita ama cuanaja ijacaju mique pureama abuque. Tunaja yacuaju mique pureama abuque jeru cuana tsehue, Yusu” jadya.

¹⁰Moisesratu huenecuaredya Yusuja quisarati: “Arepa micuana israelita ama cuana ama bucha, jida pureama micuana jubuque Yusuja emepe cuana tsehue” jadya.

¹¹Davidratu huenecuaredya Yusuja quisarati: “Micuana israelita ama cuanara tuque micuana jadya abuque: ‘Miquemi dyaque jida, Yusu’. Micuana dutya anaera tuque micuana jadya abuque: ‘Miquemi dyaque jida, Yusu’”.

¹²Yusuja quisarati cuejaqui Isaiasratu huenecuare béru: “Ejitajutu jubuque Isaí eque juracanayaque. Israelita ama cuanaja ecuaritu jubuque. Tuaqueja tuna catyatidadibuque”, jadyatu Isaiasra huenecuare Jesús jadya ayaque.

¹³Yusura ecuana yunerineya ejeque huecaca ecuana tuaqueja judirubuque ni eje tupu jaca ishu ama. Tura jida neamerecue. Inime tsapematu neamerecue, micuana tuaqueja catyatihua tibu. Yusuja Espíritu tu micuana tsehue. Tuquetu dyaque casada. Tura cuitadya micuana ejenemerebuque ejeque huecaca micuana Yusu queja judirubuqueque.

¹⁴Cuejaya micuana riyaque, micuana ecue eatsehuequi cuanaque. Eratu pana ejenedya aya micuana peya cuana tsehue jida cabatiyaque. Bahue ique micuanara quisarati yunerique pana adeba ayaque, micuanara peya cuana bahuityayaque.

¹⁵Jadya ama bucha tuque ecue inime juhua: “Arepa tuna pana adeba yunerique aya ama bucha, huenetaqui tibu rique huenehuadya dutya riya cuanaque jida, tuyu, mui cueja, tuna adebamerenuca ishu”, jadya tuque inime tupuhua. Pana cueja micuana ahua ecue cuejataquique, ni riya piji buchique ai tehuatsu ama. Yusura cuatsashayaju cuitadya rique jadya huenehua.

¹⁶Tura ique mepehua Jesucristo mere ishu. Cuadishahua tura ique israelita ama cuanaque tuja quisarati cueja ishu. Paera Yusuja quisarati ecuita cuana ecuejau bucha, jadidya ique juya. Ecue mere tu israelita ama cuanaque Jesús queja catyati tsahua. Tuna Jesús queja catyatiyaju, Yusutu dyaque pureama juya tuna tsehue. Tura tuna jida baya, tuja Espiritura cabapetishahua tibu.

¹⁷Jadya tibu ique casumitiya Cristo Jesúsra micuana ique eque eje bucha amerehuaque baatsu. Ique pureama juya, Yusu jadya meree aya cabatitsu.

¹⁸Cristo ique eque israelita ama cuana ducu eje bucha juhuaque cuita camadya quisarati paa. Yusura tuja quisarati cuejamerehua tuna tuaqueja catyati ishu, tuna tura amereya eque juishu. Era tuna cuejayaque bacatsu, ique Yusuja biji eque aniya baatsu jadya tuna Jesús queja catyatihua.

¹⁹Turadya ique amerehua ejeque ecuitaja ataquique ama, tuna ique Yusuja ishu mere juyaque bahue juishu. Bape tunajatu bahua. Yusuja Espiritura ique amerehua. “Jesús queja ni micuana catyatiya, Yusura micuana Ijahua quejaque inajacamereya”, jadya tuna dutya queja cuejacuejanihua. Icuene cuita tuque cuejahua Jerusalénju aniya cuanaque. Tumeque epu arida juque cuinanatsu, junenihua ique epu cuanaju, quisarati cueja juyaque. Iliria japada epu cuanaju ique cuejacuejaajehua.

²⁰Dyaque bijida tuque ecue juhua Cristoja quisarati cueja ishu eju ecuita cuanaja quisarati bacama jariju. Bijida tuque ecue juhua quisarati icueneta cueja aishu eju peya cuanaja bacama jariju.

²¹Berutu Yusura Isaías queja huenemerecuare: “Yusuja Ecuadishaja quisarati bacama cuita cuanaratu bacabuque tuque cuejatayaju. Tuque adebaya ama cuanaratu adebabuque”, jadyatu Isaiasra huenecuare. Eratu cuejahua riyaque quisarati bacama cuana cuita queja, riya ehuene equedya.

²²Aijama cuita tuque ecue emajaca juchine tumeque epu cuanaju quisarati cueja juyaque. Jadya tibudya cuataqui ama jari cabatiya Romaju micuana cuajira.