Ulom 5:4-17

⁴Kitil keyemei, nu ki keko, kilele kiol kuw kakabomi, beem dulum elote kalaing kuw keko, Sunbin-Got em toloke ding fenkabuluw te.

⁵Fenbomeluwi, nu nam inkal kemuw te. Nimtew angom? Sunbin-Got e nulo Sunbin-Finik be duyemse kasike. Beem mongom ete nu kilele kal keluwete: “Fein! Sunbin-Got e akalem ibolow mutuk fian be num ibolow mutuk tem ka kel duyemkabe kai!”, angeko, kal kekabuluw te.

⁶Feinka! Num kuankemin deiw ka kel kakabomi, kuanomin kis kebuluw ding dim bakate, Kulais e num ibolow sili sili nam beem sen ete kuanse te.

⁷Yu kilele ibolow fukunina! Kawin dim kaleem mali kunum mak i kiol kunum mak elo dokolewomin beem mongom ete kuanokoliw sako? Babo, i nam kaneliw te! Kate, kunum mali mak mali kunum elo ibolow mutuk fian dulewiw tewe, i “Yakai! Nu elo dokoleweko, em abin kuluko, kuanokoluw te!”, angeko, angin tew kelokoliw te.

⁸Kate, Sunbin-Got e ikate tew kelinba kese te. Nimtew angom? Num sili sili nam kukuw beem deiw kakabisuluw ding dim bakate, e nulo akalem ibolow mutuk fian be kukuyemsomelei, Kulais e num dulum elote kuanse te.

⁹Kuanei, akalem kuankemin beem mongom ete nu kame Sunbin-Got em kiin dim e kiol kuw sen so banim kunum waneng kekabuluw kasike, Sunbin-Got em kaisuw fian e nulo abanggayemkabe te.

¹⁰Yu kilele ibolow fukunina! Num Sunbin-Got eso maka keko, gal kelewbisuluw ding dim bakate, e akalem min elo dabalei, e num dim kuaneko, maka kelew kelew deiw be gato keleweko, Sunbin-Got eso nuso ibolow menew koyemsomi, ibolow ki makmak keyemse te. Keyemse kasike kame, e nulo fein kuw dokoyemkabe te. Nimtew angom? Sunbin-Got e akalem Min elo fomkamin dim elote dawkalfolei, e iti finik so baba teinsomi, num dim ka kel diwkuw diwkuw mewso alakabe kasike.

¹¹Keko beli, Kamok Fian Yesus Kulais em Sunbin-Got eso nuso ibolow menew keyemse beem dulum elote nu kame akati Sunbin-Got em dulum elote kakat fian keko, kalfong so kakabuluw te.

¹²Num abiok makmak Adam e emisik keko, Sunbin-Got em dangse kitil weng beelo sakalaw keko, weng bo bo kelewse kasike, ibolow sili sili nam kukuw be kawtiw alik alik angom num dim akati talse kale. Telesomelei, ibolow sili sili nam em yan wa bakati kawin dim kaleem kawtiw alik alik num dim taluyemei, nu finik banim keko, kuanokoluw te.

¹³Kawtiw alik alik angom nu ibolow sili sili nam kukuw gelewkakawkabuluw kate, Sunbin-Got e bokolomele: “Ne kawtiw biim sawa beelo sakalaw keko, weng bo bo kekabiliw beem yan wa be nam duyemi te!”, angse kale. Nimtew angom? Kaem ding dim bakate, e akalem sawa weng be kaim dim kel dalinba kese kasike.

¹⁴Feinka! Adam em ding dim elote teleko, Moses em kese ding dim bakate, Sunbin-Got e fawtuk ayem sawa weng be dukulinba kese kate, kaem ding dim bakate, kuankemin be kawtiw alik alik num kamokim keyemale kale. Fein! Nu nukalem abiok Adam emdiw Sunbin-Got em dangse kitil weng be sakalaw keko, weng bo bo kelinba kesuluw kate, nu em muluwel dow kebuluw kasike, em sakalaw keko, weng bo bo kelewse beem yan be num dim elo akati telesomi, nukati kuanakabuluw te. Kame, yu kilele kililina! Adam beem kanese kukuw beem mongom ete kawtiw banban mak im dim ete dem wa be gilase te. Kate, Kulais em kanese kukuw beem mongom ete kawtiw banban mak im dim ete dem ken ati kuw gilakabe te. Feinka! Adam e Kulais em kaneloke em kiskiw emdiw kese kale.

¹⁵Yu kililina! Adam e sakalaw keko, weng bo bo kunum kese kate, Sunbin-Got e kawtiw nulo ibolow folok kukuyemkabe te. Sua em kunum makmak Adam em kanese sili sili kukuw beem mongom ete kawtiw banban mak kuaneko, finik banim kekabiliw te. Kate, Sunbin-Got em ibolow fukunin e kanese emdiw bate. E kawtiw nulo ibolow folok keyemeko, Yesus Kulais makmak kunum beelo sak misim kuw num dim elo dabalalei, e kunum waneng banban nulo Sunbin-Got em ibolow folok be kukuyemeko, nulo dokoyemeko, nulo finik so buluw kunum waneng keyemse te.

¹⁶Sakalaw kunum Adam beem kanese kukuw so, Sunbin-Got em sak misim duyemkabe kukuw beso, alew kukuw be ki bate. Mak akal amen mak akal amen ete te. Sua kel alenale kunum makmak beem sakalaw keko, weng bo bo kese kukuw beem mongom ete Sunbin-Got e kawtiw alik alik ilo diwyemeko, geeyembelei, i kal ilum fian mak kulukabiliw te. Kulukabiliw kate, kawtiw ibolow sili sili nam kawtiw banban im dulum elote kunum makmak be ilo dokoyemomin talse kasike, Sunbin-Got e kawtiw alik alik biim ibolow sili sili nam kukuw be sak misim kuw kulu koyemeko, ilo akalem kiin dim e kiol kuw sen so banim kunum waneng keyemkabe te.

¹⁷Yu kilele ibolow fukunina! Kunum makmak em sakalaw keko, weng bo bo kese beem mongom ete kuankemin be kawtiw banban im kamokim kekakawkabe te. Kebe kate, nu atin kuw kal keluwete: Sunbin-Got e kuankemin kamok be de mit da kolewse te. Kolewsomi, akalem ibolow folok keyemsomi, Kulais Yesus em kanese beem mongom ete kiol kuw sen so banim keyemse kunum waneng biim dulum elote finik so bin be im fein kamokim keyemei, nu kal kekabuluw te.