Lom 5:4-17

⁴Nɑ suulu yekinɑ nɑ yʋlʋ kɑntǝlǝɣɩ wɑhɑlɑ tɑɑ, nɑ kɑntǝlʋɣʋ yekinɑ nɑ tɛɛlʋɣʋ kɔɔ.

⁵Tǝ tɛɛlʋɣʋ mpʋ tɔ pǝ tɑ puɣusi-tʋ se. Pǝ tɑɣɑ pʋlʋ, Feesuɣu Nɑŋŋtʋ wei Ɩsɔ hɑ-tʋ tɔ ɩnɩ ɩ lɑpǝnɑ nɑ tɑ́ tǝnɑ tǝ́ nyɩ teu sɩ Ɩsɔ sɔɔlɑ-tʋ.

⁶Tǝ tɑɑ pǝsǝɣɩ pʋlʋ tɔ Kilisiti sǝpǝnɑ ɑsɑɣɑɑ tɑ́, tɑ́ tɔɔ kɛ́ sɑɑ wei pǝ mɑɣɑ Ɩsɔ tɔ.

⁷Amɑ sɩ yʋlʋ ɩ́ tisi nɑ ɩ́ sɩ siɣisulu tɔɔ tɔ, tǝcɑtǝtǝyɑʋ kɛ́. Ń tɑ tɩɩ nyǝm nɔɣɔlʋ nɑ́ wɛɛ wei ɩ pǝsǝɣɩ nɑ ɩ́ sɩ yʋlʋ kʋpɑŋ tɔɔ tɔ.

⁸Pɑɑ nɑ mpʋ Ɩsɔ nɑ́ hʋlɑ-tʋɣʋ ɩsǝnɑ tǝnɑɣɑ ɩ sɔɔlɑ-tʋ tɔ. Kilisiti sǝpɑ tɑ́ tɔɔ pɑɑ nɑ tǝ kɛ́ ɑsɑɣɑɑ tɔ.

⁹Ɩ sǝm tɔɔ kɛ́ tǝ pǝsɑ yʋlʋpɑmɑ kɛ kɑɣɑnɑɣɑ Ɩsɔ ɩsɛntɑɑ, ɩlɛ ɩsǝnɑɣɑ pɩɩ kpisi-tʋɣʋ yɑpʋ kɛ Ɩsɔ pɑ́ɑ́nɑ́ niŋ tɑɑ?

¹⁰Tɑ́ nɑ Ɩsɔ tɩɩ wɛ koloŋɑ kɛ́. Amɑ ɩ Pǝyɑɣɑ sǝm tɑɑ kɛ́ ɩ lɑpɑ nɑ tɑ́ nɑ-ɩ tǝ́ ciiki. Tɔʋ, kɑɣɑnɑ tɑ́ nɑ Ɩsɔ tǝ wɛ leleŋ. Pǝ́cɔ́ ɩ Pǝyɑɣɑ nɑ́ wɛnɑ weesuɣu tɔtɔ, ɩlɛ kɑɑ wɑɑsɩ-tʋ nɑ pǝ́ kǝlɩ mpʋ.

¹¹Nɑ pǝ tɑ tɩɩ kɛʋ pǝ tǝnɑɣɑlɛ, tǝ tɔŋnɑ Ɩsɔ ɩlɛɣɛ yɔɔlǝnɑʋ kɛ Tɑcɑɑ Yesu Kilisiti wei ɩ lɑpɑ nɑ kɑɣɑnɑ tɑ́ nɑ Ɩsɔ tǝ́ ciiki tɔ ɩ tɔɔ.

¹²Yʋlʋ kʋlʋm tǝnnɑ ɩsɑɣɑtʋ sʋʋ yǝlɑɑ tǝnɑ. Ɩlɛnɑ ɩsɑɣɑtʋ nɑ́ɑ́ kɔnɑ sǝm. Nɑ sǝm nɑ́ɑ́ yɑ yǝlɑɑ tǝnɑ tɔɔ. Pǝ tɑɣɑ pʋlʋ, pɑ tǝnɑ pɑ lɑpǝnɑ ɩsɑɣɑtʋ tɔ pǝ tɔɔ.

¹³Ɩsɑɣɑtʋ kɑ tɛmɑ ɑntulinyɑ tɑɑ kɛ́ wɛɛʋ nɑ pǝ́cɔ́ Ɩsɔ tʋ Moisi kɛ kʋsǝsɩɩtʋ. Amɑ ɩsɩɩ kʋsǝsɩɩtʋ tɑɑ fɛɩ ɩlɛ, Ɩsɔ tɑɑ nyǝnɩ-tɩ ɩsɩɩ pʋlʋ.

¹⁴Pɑɑ nɑ mpʋ sǝm nɑɑ tɔɣɔ kɑwulɑɣɑ kɛ pǝ kpɑɣɑʋ Atɑm nɑ pǝ́ polo Moisi, hɑlǝnɑ pǝ́ cɑŋ pǝ́ kpɛŋnɑ mpɑ pɑ tɑɑ lɑ ɩsɑɣɑtʋ nti Atɑm lɑpɑ tɔ. Ɩsɔ kʋheelitu kɛ Atɑm nɑ́ kpɛɛsǝnɑɑ nɑ ɩ́ pǝsɩ ɩsɑɣɑʋ. Atɑm ɩnɛ ɩnɩ ɩ nǝɣǝsǝnɑ wei ɩ kɑɑ ɩ kɔɔ tɔɣɔ.

¹⁵Amɑ pɑ tɑ lɩɩ kʋlʋm. Pǝ tɑɣɑ pʋlʋ tɔɔ, mpi Ɩsɔ hɑwɑ fɑɑlɑɑ tɔ pǝ fɑɣɑnɑ ɩsɑɣɑtʋ nti Atɑm lɑpɑ tɔɣɔ. Mpi tɔ, yʋlʋ kʋlʋm ɩnɛ ɩ ɩsɑɣɑtʋ tɔɔ yǝlɑɑ pɑɣɑlɛ sǝpɑ. Amɑ Ɩsɔ pɛɛlɛɛ nɑ́ temɑ pɑɣɑlɛ nɑ pǝ́ tɛɛ ḿpʋ́ɣʋ́ sɔsɔm, nɑ pǝ kɑɑsɩ kʋcɔɔʋ ŋku ɩ lɑpɑ fɑɑlɑɑ nɑ yʋlʋ kʋlʋm Yesu Kilisiti kiŋ tɔ kʋlɛ kʋ tɔɔwɑ sɔsɔm tɔtɔ.

¹⁶Amɑ yʋlʋ kɑɑ kpɑɣɑ mpi Ɩsɔ kʋcɔɔʋ lɑkɩ tɔ nɑ ɩ́ mɑɣɑsǝnɑ mpi yʋlʋ kʋlʋm ɩsɑɣɑtʋ lɑkɩ tɔ. Pǝ tɑɣɑ pʋlʋ tɔɔ, ɩsɑɣɑtʋ kʋlʋmtʋ lɑpǝnɑ nɑ pɑ́ hʋʋnɑ yǝlɑɑ nɑ pɑ tɔm sɩ. Amɑ Ɩsɔ fɑɑlɑɑ kʋcɔɔʋ nɑ́ tɑɣɑnɑ ɩsɑɣɑtʋ pɑɣɑlɛ nɑ pǝ́ lɑ teu.

¹⁷Kʋlʋm ɩsɑɣɑtʋ tɔɔ kɛ́ sǝm tɔɣɔ kɑwulɑɣɑ mɛɛ, nn kʋlʋm ɩnɩ ɩ tike ɩ tɔɔ kɛ́. Amɑ nti Yesu Kilisiti tike kɔnɑ-tʋ tɔ tǝlɛ tǝ kǝlɑ ḿpʋ́ɣʋ́ tɔɔʋ tǝcɑɣɑcɑɣɑ. Pǝ wɛɛ sɩ pɑ tǝnɑ mpɑ pɑ hikɑ Ɩsɔ pɛɛlɛɛ kɛ sɔsɔm sɔsɔm nɑ ɩ́ lɑ nɑ pɑ́ pǝsɩ kʋpɑmɑ kɛ fɑɑlɑɑ tɔ, Kilisiti tɔɔ pɑɑ hiki weesuɣu nɑ pɑ́ tɔɣɔ kɑwulɑɣɑ.