ROM 5:4-17

⁴Marepi hepene nomo lo tei kairefiyeyei su, Owane Sitewi nomo ne marepi au wisereye nine'irowa. Owane Sitewi nomo ne au wisereye nine'irowa su, nomo Jisas lo si tame itoraiyei ape, ninawesiya.

⁵Serai nomo Jisas lo si tame itoraiyei ape, ninawesiya su, nomo marepi orese a'i iro se ta'ame. Owane Sitewi lai te'e naneiyei lo nomo ma'e auwe. Le nomo ma'e te'e naneiyei ape pefine a'i henerairowa. Owane Sitewi lai marepi tote wawesiyeyei lo nomo ma'e ani teroso arosai. Le marepi nomo lo papu au teme'eriyeye. Owane Sitewi lai wara'i a'i lo nomo ma'e eimawe arosai su, le Owane Sitewi lo marepi tote wawesiyeyei erasi a'i nomo ma'e auwe.

⁶Nomo lai marepi hepene towafi nomo lo au feraferei ta'ame su, Meni Krais Jisas nomo ne, yo seni luwaru a'i ironamiteye ape, au temeniyeye. Owane Sitewi lai nowe ta ariariyeyewe, meni eime lo Krais Jisas hi awei sahe nomo ne fa temeniyeye ne eimawe arosai.

⁷Owe nomo piye meni ta lai meni wara'i a'i ne au ferafereiyei ne temeniyerowa. Ahowa, lu tamo lai fara'u meni wisere au ferafereiyei ne temeniyerowa.

⁸Ahowa, Owane Sitewi lai nomo ma'e marepi tote wawesiyeyei erasi a'i au atuatunamisiya. Nomo yo seni luwaru a'i ironamiteye su, meni ape Krais Jisas nomo ne temeniyeye. Jo 3:16; 1 Jo 4:10

⁹Krais Jisas nomo ne temeniyeye su, nomo Owane Sitewi lo nihe se lu taune wara'i a'i irosiya. Serai peri ape wiyeme a'i tene! Wiyawi lo ape se, Owane Sitewi lai nomo ma'e ai marepi toterowata. Ro 1:18; 2:5

¹⁰Ane fene ma'e peri eti au te'esiya. Tu naifa nomo yo seni luwaru a'i ironamiteye su, nomo Owane Sitewi lo airame lu taune iroteye. Serai Owane Sitewi lai meni eime lo nomo ne temeniyeyei ne eimawe arosai. Serai nomo nati wafei pefine a'i lo henerai. Nomo nati wafei pefine a'i lo henerai su, nomo etiri ape so'oruwesiya. Owane Sitewi lai Jisas Krais si fisiye yo sahe au ta'ane norohuwe sineye su, nomo Owane Sitewi lo ai marepi teriterowata.

¹¹Ane peri tere'e fene ma'e au te'esiya. Owane Jisas Krais wiyawi lo ape nomo ne iroteye su, marepi nomo lo Owane Sitewi ma'e wisere erasi a'i au nine'inamitorowa. Sosu aiwawe a'i nomo Owane Sitewi ma'e nati wafei pefine a'i henerai.

¹²Tu naifa weriyei meni tutawe lai yo seni luwaru a'i irowe. Serai lu taune werese werese meni ape lo yo seni luwaru a'i mo'o umasiteye. Meni tutawe yo seni luwaru a'i irowe su, hepene lo temeniyeye. Serai lu taune werese werese yo seni luwaru a'i iroteye su, hepene lowe werese lo aiwawe a'i temeniyeye. Piyene awere? Lu taune werese werese a'i yo seni luwaru a'i ironamiteye. Stt 3:6; Ro 6:23

¹³Serai yo seni luwaru a'i awei sahe iroteye. Sosu mo'o Owane Sitewi lai meni Moses ma'e yo peri pefine a'i lo au te'eye. Ahowa, nowe ape se Owane Sitewi lo yo peri pefine a'i henerai ta'ama. Owane Sitewi lai lu taune lo yo seni luwaru a'i au hese ereirowata. Ro 4:15

¹⁴Adam lo nowe se aiwawe a'i Moses henerai su, lu taune werese temeniyeteye. Adam Owane Sitewi ma'e yo seni luwaru a'i irowe. Le Owane Sitewi lo peri wanu arisiye. Lu taune tere'e werese lowe yo seni luwaru a'i tere'e apou ape iroteye su, lowe werese aiwawe a'i temeniyeteye. Meni ape, Adam, yo seni luwaru a'i irowe su, lu taune werese yo seni lo umasiteyewe, yo seni luwaru a'i iroteye. Aiwawe a'i Jisas, Owane Sitewi lai hi awei ma'e eimawe arosai ape, me tape'i sahe temeniyeye su, le lu taune werese ne temeniyeye.

¹⁵Lu hesi ape, Adam sosu Krais Jisas lowesi tere'e tere'e se. Meni Adam yo seni luwaru a'i irowe su, lu taune werese werese aiwawe a'i yo seni luwaru a'i iroteye. Serai lowe werese lo marepi hepene temeniyeteye. Ahowa, nomo apou so'oruwe tene! Meni ape Jisas Krais, le Owane Sitewi lo ferafereiyei lu taune tomu ne'ese ma'e neri a'i auwe.

¹⁶Adam yo seni luwaru a'i tutawe irowe su, Owane Sitewi lai meni ape au hese ereiye. Owane Sitewi le ma'e apou eiye, “Ne yo seni luwaru a'i irowe su, ne fa temeniyere.” Ahowa, etiri ape Owane Sitewi neri a'i auwe ape, tere'e tere'e ne. Lu taune werese werese a'i yo seni luwaru a'i ironamiteye su, Owane Sitewi lai ferafereiyei lo lu taune werese ma'e neri a'i au atuatu areiyeye. Lu taune Owane Sitewi lo ferafereiyei tote tawesiyei su, le lowe werese ma'e lu taune aseyaro wara'i a'i au eirowa.

¹⁷Meni tutawe ape yo seni luwaru a'i irowe su, temeniyeyei ape lu taune werese ma'e henerai. Ahowa, nomo apou so'oruwesiya tene! Lu taune tamo Owane Sitewi lo ferafereiyei pefine a'i tote tawesisiya su, lowe Owane Sitewi lo nihe se lu taune aseyaro wara'i a'i henerai tepa'asiye. Serai Owane Sitewi lai lowe ma'e marepi hepene he'i pefine a'i aurowa. Meni Owane Jisas Krais temeniyeye su, lu taune werese le ne tote tawesinamisiya ape, lowe mi mi weriyei weriyei yo seni wara'i a'i ironamitorowa.