Romanos 5:4-17

⁴Ruma kꞌu runimal qakꞌuꞌx kojelik utz qaꞌanom chwach ri Dios, ma xqachꞌij uchuqꞌabꞌ ri kꞌambꞌal qapa. Yey we xojelik utz qaꞌanom chwach ri Dios, e lik kakubꞌiꞌ pan qakꞌuꞌx rukꞌ Rire.

⁵Lik kꞌu jikil uwach kaqakꞌul na ri qoyeꞌem che ri Dios, ma Rire lik ukꞌutum ri rutzil ukꞌuꞌx chiqe ruma ri Santowilaj Ruxlabꞌixel uyaꞌom pa qanimaꞌ.

⁶Ma riꞌoj na jinta kꞌana qachuqꞌabꞌ re kaqakolobꞌej qibꞌ; yey chupa kꞌu ruqꞌijol uchaꞌom chi lo ri Dios, xkꞌun ri Cristo y xuya ribꞌ pa kamik chaꞌ kojukolobꞌej ri oj aj makibꞌ.

⁷Lik kꞌayew kariqitaj junoq kuya ribꞌ pa kamik pukꞌaxel jun chik lik jusukꞌ rubꞌinik usilabꞌik; tobꞌ ne laj kꞌo junoq kuya ranimaꞌ kakam pukꞌaxel junoq lik utz ukꞌuꞌx.

⁸Noꞌj ri Dios uqꞌalajisam chi ri rutzil ukꞌuꞌx chiqawach riꞌoj, ma ri Cristo xkam paqakꞌaxel echiriꞌ kꞌa oj kꞌo ne pa mak.

⁹We xꞌaniꞌ kꞌu jusukꞌ chiqe ruma rukikꞌel, makꞌuwariꞌ ruma Rire kojkolobꞌetaj na chwach ri qꞌatbꞌal tzij kuꞌan ri Dios chupa ri kꞌisbꞌal qꞌij.

¹⁰E rojertan riꞌoj oj aj retzelal kꞌuꞌx chirij ri Dios; na rukꞌ ta kꞌu riꞌ, ri Dios xojuya chi utzil chomal chwach ruma rukamik Rukꞌajol. Makꞌuwariꞌ we oj kꞌo chi pa utzil chomal chwach, kayaꞌtaj na kꞌu riꞌ ri qakolobꞌetajik ruma ri Cristo, ma Rire xkꞌastaj lo chikixoꞌl ri ekaminaq yey woꞌora kꞌaslik.

¹¹Y na xew ta waꞌ, ma lik kojkiꞌkot rukꞌ ri Dios ruma ri Qanimajawal Jesucristo, ma ruma Rire qariqom utzil chomal chwach ri Dios.

¹²Ri mak xok lo che ruwachulew ruma ri Adán, ri nabꞌe achi; yey ri mak e xukꞌam lo ri kamik. Jekꞌulaꞌ xpe ri kamik pakiwi konoje ri tikawex, ma konoje xemakunik.

¹³Echiriꞌ ri Dios kꞌamajaꞌ ne kuya Rutzij Upixabꞌ che ri Moisés, ri mak okinaq chi che ruwachulew. Qatzij, we na jinta taqanik, na utz taj kabꞌiꞌxik kꞌo junoq xupalajij tzij.

¹⁴Na rukꞌ ta kꞌu riꞌ, chwi lo ri Adán kꞌa chwa ri Moisés, taq ri winaq xekam ruma ri kimak, tobꞌ ri kimak na junam ta rukꞌ ri xuꞌan ri Adán echiriꞌ xupalajij ri taqanik re ri Dios. Yey ri Adán e pachaꞌ ri Jun kakꞌunik, waꞌ e ri Jesucristo.

¹⁵Pero ri xukꞌam lo ri palajibꞌal tzij re ri Adán lik junwi chwa ri sipanik xukꞌam lo ri Qanimajawal Jesucristo. Ma ruma rupalajibꞌal tzij jun chi achi, xekam konoje ri winaq; yey ruma kꞌu ri unimal rutzil ukꞌuꞌx jun chi Achi, ri sipanik re ri unimal rutzil ukꞌuꞌx ri Dios más ne xnimar pakiwi ukꞌiyal tikawex.

¹⁶Ekꞌu ri xukꞌam lo ri mak re ri jun achi, lik junwi chwa ri xukꞌam lo ri sipanik kuya ri Dios chiqe. Ma ruma jun chi mak re jun chi achi, xkꞌun ri qꞌatbꞌal tzij pakiwi konoje ri tikawex. Noꞌj ruma ri sipanik re ri Dios, kasachisax uwach ri ukꞌiyal mak ke ri tikawex chaꞌ jelaꞌ utz kekꞌojiꞌ jusukꞌ chwach ri Dios.

¹⁷Xa kꞌu ruma rupalajibꞌal tzij jun chi achi, konoje ri winaq xekanaj kan chuxeꞌ ruchuqꞌabꞌ ri kamik. Yey ruma kꞌu jun chi Achi, waꞌ e ri Qanimajawal Jesucristo, janipa ri kikꞌulum ri unimal rutzil ukꞌuꞌx ri Dios y ri sipanik re kebꞌuꞌan jusukꞌ chwach, kejeqiꞌ chupa jun chomilaj kꞌaslemal.